Ձեր վստահելի աղբյուրը

«Ակնհայտ է, որ օրվա իշխանությունը փորձում է երկիրը տանել նոր կապիտուլյացիայի և նման գռեհիկ անմիտ ելույթներ են ունում՝ հերթական անգամ մեր ժողովրդին խաբելով, մոլորեցնելով և Ալիևով վախեցնելով»,-արձագանքելով ԱԺ ամբիոնից ՔՊ պատգամավորների այն հայտարարությանը, թե Արցախ մեկնելով ընդդւմադիր պատգամավորները վտանգում են արցախցիներին՝ ԱԺ միջանցքում լրագրողներին ասաց «Հայաստան» խմբակցության պատգամավոր Իշխան Սաղաթելյանը:

Նրա խոսքով՝ Արցախի շուրջ շատ արագ և մտահոգիչ գործընթացներ են տեղի ունենում, որի վկայությունն է վերջին բրյուսելյան հանդիպումը:

Սաղաթելյանը հայտնեց, որ ընդդիմությունը գտնում է, որ այսօր թիվ մեկ խնդիրը Արցախի և Հայաստանի անվտանգությունն է և այս պահին երկրի կենսական շահերի հետ անմիջական առանչություն չունեցող հարցեր ԱԺ-ում քննարկելը նպատակահարմար չեն գտնում, այդ պատճառով էլ խորհրդարանական երկու խմբակցությունները որոշել են քառօրյային չմասնակցել այլ մեկնել Արցախ, Սյունիք և Գեղարքունիք:

Պատգամավորի տեղեկացմամբ՝ ընդդիմությունն այդ այցերի ընթացքում կհանդիպի և կաշխատի ժողովրդի հետ, կբարձրացնի անվտանգային հարցեր:

Իշխան Սաղաթելյանի խոսքով՝ հանրության ուշադրությունը պետք է սևեռվի արցախյան հիմնախնդրի վրա, քանի որ իշխանությունը հեռացել է այդ օրակարգից:

Նա հայտնեց, որ Հայաստանի բոլոր մարզերում ՀՀ քաղաքացիները ինքնակազմակերպվում և բարձրացնում են Արցախի դրոշը, ինչը խոսում է համապատասխան մթնոլորտի մասին:

Անդրադառնալով դիտարկմանը, որ ՔՊ պատգամավորները հայտարարում են, որ ԱԺ դահլիճում Սեյրան Օհանյանի կողմից Արցախի դրոշի բարձրացումը շոու է՝ ԱԺ փոխխոսնակն ասաց. «Այն մարդիկ, որոնք Արցախի դրոշները բարձրացնելիս նոպաներ են ունենում, այն իրենց պրոբլեմն է: Դրոշի բարձրացումը ձևական ակցիա չէ, այլ շատ հստակ քաղաքական և ժողովրդական ուղերձ է և դրսի երկրներին և օրվա իշխանություններին: Ով Արցախի դրոշի դեմ ոտնձգություն անի, ինքն Ալիևից և թուրքերից ոչնչով չի տարբերվում, մեր ժողովուրն այդ դրոշի համար պայքարել է, արյան գնով ազատագրել է Արցախը»:

Սաղաթելյանի խոսքով՝ իշխանություններն իրենց անգործությունը, Արցախի նկատմամբ դավաճանությունը հիմնավորելու նպատակով փորձում են ժողովրդին ասել, որ նման քայլերով ընդդիմությունը կվտանգի Արցախը, բայց իրենք այդեն վտանգել են այն:

«Մենք գնում ենք ժողովրդին կազմակերպելու և ոտքի հանելու ճանապարհով»,-հայտարարեց «Հայաստան»  դաշինքի անդամը և տեղեկացնելով, որ այդ նպատակով կան պլանավորած գործողություններ, հավելեց. «Բոլոր այն կարծիքները, թե իրենք ժողովրդի կողմից ունեն երկիրը նոր զիջումների տանելու մանդատ, իրականությանը չի համապատասխանում, այս օրերին մեր հայրենակիցներն իրենց հակառակ դիրքորոշումն հստակ հայտնեցին»: