Ձեր վստահելի աղբյուրը

«Անհետ կորածների, գերիների և այլ պահվող անձանց ազատ արձակման խնդիրը մեր առաջնային ուշադրության կենտրոնում է, դա մեր ամենժամյա աշխատանքի թեման և թիրախն է»,-ԱԺ-ում հարցուպատասխանի ընթացքում հայտարարեց արտաքին գործերի նախարարի պաշտոնը զբաղեցնող Արարատ Միրզոյանը։

Նա նշեց, որ չի կարող մտաբերել որևէ լուրջ հանդիպում և քննարկում, որտեղ այս թեման չի արծարծվում։

«Այո, Ադրբեջանը ցայսօր չի կատարել նոյեմբերի 9-ի եռակողմ հայտարարությամբ ստանձնած իր պարտավորությունը, այն է՝ անհապաղ ազատ արձակել բոլոր ռազմագերիներին, պատանդներին և այլ պահվող անձանց։  Բայց գիտեք, որ տարբեր պարտվակներ է բերում Ադրբեջանը, խնդիրը կապում է ականապատված դաշտերի  քարտեզների հետ, թեև նոյեմբերի  9-ի հայտարարությամբ որևէ  այդպիսի կորելացիա չկար, այժմ Ադրբեջանը փորձում է խնդիրը կապել Ղարաբաղյան առաջին պատերազմում անհետ կորած անձանց փնտրելու հարցի հետ։

Այդ հարցերն ընդհանրապես իրար հետ կապ չունեն, այնուամենայնիվ, մենք, որպես բարի կամքի նշան, արել ենք և շարունակում ենք անել մեր շատ մարդասիրական քայլերը, և ակնկալում ենք, որ նույնպիսին էլ պետք է լինի Ադրբեջանի պահվածքը և մարդասիրական նկատառումներից ելնելով, նաև նրանից,  որ ուղղակի իրենց պարտավորությունն է գրված թղթի վրա», - ասաց Միրզոյանը։ 

Նա հայտնեց, որ թեման քննարկվել է Նիկոլ Փաշինյանի, Ադրբեջանի նախագահի և Շառլ Միշելի՝ բրյուսելյան հանդիպման ընթացքում։

«Կա պատկերացում, որ հայ պատանդների հերթական խումբը պետք է ազատ արձակվի։ Մենք հիմա շարունակում ենք բանակցել դրա շուրջ», - ասաց Արարատ Միրզոյանը։