Ձեր վստահելի աղբյուրը

«Սոթք-Խոզնավար հատվածում տեղի ունեցածն անշուշտ զինված ուժերի և կառավարության ձախողումն է, բայց այն՝ թե ինչպես տեղի ունեցածին արձագանքեց ՀԱՊԿ-ը, կարծում եմ, որ ձախողում էր նաև կազմակերպության համար»,- ԱԺ-ում հայտարարեց Նիկոլ Փաշինյանը և հավելեց.

«Ի հեճյուկս գոյություն ունեցող ընթացակարգերի՝ ՀԱՊԿ-ը մինչ օրս խնդրո առարկա հատվածում մոնիթորինգ իրականացնելու որոշում չի կայացրել՝ արդարացնելով երկար տարիներ հայ հանրության շրջանում առկա մտավախությունը, թե Հայաստանի անվտանգության համակարգի համար կարևորագույն նշանակություն ունեցող այդ կազմակերպությունն անհրաժեշտ պահին ոչինչ չի ձեռնարկի՝ մնալով դիտորդի կարգավիճակում»:

Փաստելով, որ ՀԱՊԿ-ը նույնիսկ դիտորդի կարգավիճակով որևէ ձևով այդ իրավիճակը չի հասցեագրել՝ նա նկատեց, որ ադրբեջանական զինված ուժերը շարունակում են ներկա գտնվել Սոթք-Խոզնավար հայտվածում՝ իրական սպառնալիքներ ստեղծելով Հայաստանի Հանրապետության անվտանգության համար:

«Բայց նաև ուզում եմ արձանագրել, որ այդ իրադարձությունների հետևանքով օկուպացիայի տակ հայտնված 45 ք/կմ տարածքները, ցավոք, միակը չեն: ՀՀ-ում դեռևս 90-ականների սկզբից ևս շուրջ 70 ք/կմ տարածք գտնվում է այդ կարգավիճակում և, ինչպես ասել եմ, մեր քաղաքականությունն է հարցի լուծումը դիտարկել դեմարկացիայի և դելիմիտացիայի հանձնաժողովի համատեքստում»,- ասաց Նիկոլ Փաշինյանը: