Ձեր վստահելի աղբյուրը

«Լեռնային Ղարաբաղում ՌԴ խաղաղապահ զորակազմի պատասխանատվության գոտում գտնվող Փառուխ գյուղ ներխուժելու պատմությունն ի ցույց դրեց, որ Ադրբեջանը չի պատրաստվում բավարարվել հոգեբանական ահաբեկչությամբ և զինված ահաբեկչության միջոցով Արցախի հայաթափումը նրա հիմնական և առանցքային խնդիրներից է»,- ԱԺ-ում ելույթի ժամանակ հայտարարեց Նիկոլ Փաշինյանը:

Նրա խոսքով՝ այդ միջադեպով հարցեր են առաջանում ԼՂՀ-ում ՌԴ խաղաղապահ զորախմբի գործունեության հետ կապված:

«Բայց այս պահին կարևոր ենք համարում, որ ՌԴ խաղաղապահ զորախումբը միջոցներ ձեռնարկի իր պատասխանատվության գոտուց ադրբեջանական ստորաբաժանումները դուրս բերելու համար։ Սա բացարձակ անհրաժեշտություն է և լրջագույն փորձություն Լեռնային Ղարաբաղում ՌԴ խաղաղապահ առաքելության համար»,- հայտարարեց Փաշինյանը:

Նա նշեց՝ տարակուսանքի տեղիք է տալիս, որ նախորդ օրը ՌԴ խաղաղապահ զորախումբը չի թույլատրել ՀՀ ԱԺ պատգամավորների մուտքը Արցախ:

«Ինչո՞ւ է տարակուսանքի տեղիք տալիս, որովհետև այդ գործելակերպը հակասում է 2020թ. նոյեմբերի 9-ի այն դրույթին։ Լաչինի միջանցքը հենց դրա համար էլ նախատեսված է, որ ապահովի Լեռնային Ղարաբաղի և Հայաստանի կապը: Ի դեպ, ուզում եմ ասել, որ միջանցքում որևէ կարգի ստուգման գործառույթ նախատեսված չէ, առավել ևս՝ ԱԺ պատգամավորների շարժն արգելափակելու»,- ասաց նա։

Շարունակելով Ադրբեջանի վարած «ռասիստական» քաղաքականության թեման, Փաշինյանը ընդգծեց, որ դրա կարևորագույն ապացույցներից մեկը հայկական եկեղեցիների վրայից հայկական արձանագրությունները վերացնելու աշխատանքային խմբի ձևավորումն է Ադրբեջանի մշակույթի նախարարությունում:

Նա հավաստիացրեց, որ այդ բոլոր փաստերը պետք է մանրամասնորեն օգտագործվի արդարադատության միջազգային դատարաններում՝ դրանք դարձնելով Արցախի բնակչության իրավունքների պաշտպանության մեխանիզմների հիմնավորում:

«Այս փաստերը պետք է օգտագործենք խաղաղության բանակցություններում մեր դիրքորոշումները հիմնավորելու և դրանց միջազգային լեգիտիմությունն ապահովելու համար»,- հայտարարեց Նիկոլ Փաշինյանը: