Ձեր վստահելի աղբյուրը

«Կառավարությունը շարունակում է հետևողական և սկզբունքային պայքարը կոռուպցիայի դեմ և դրա համար ձևավորում են ինստիտուցիոնալ նոր կառույցներ, ինչպիսին Հակակոռուպցիոն կոմիտեն է, գործարկվել է ապօրինի գույքի բռնագանձման համակարգի աշխատանքի գործնական փուլը, այն իմաստով, որ արդեն կոնկրետ բռնագանձման հայցեր են ներկայացվում դատարաններ: Ստեղծվում է Վճռաբեկ դատարանի Հակակոռուպցիոն պալատը»,-Ազգային ժողովում հայտարարեց Նիկոլ Փաշինյանը։

«Կարծում եմ՝ բոլորդ եք տեսնում, որ կոռուպցիայի դեմ պայքարում մեզ համար չկան նախկիններ և ներկաներ և այս գործընթացը մենք հետևողականորեն առաջ ենք մղելու»,- ասաց նա։

Փաշինյանը կարևորեց ինստիտուցիոնալ տրամաբանությամբ առաջնորդվելը։

Նրա խոսքով, կառավարության համար ավելի կարևոր է մեխանիզմներ ստեղծելը, որպեսզի օրվա իշխանությունը չթալանի, երկրորդ՝ նախկինի հետ կապված  գործերը պատշաճ մակարդակով քննվեն. «Այո, ես էլ գոհ չեմ, բազմիցս եմ ասել, բայց իմ դժգոհությունների, բորբոքվածությունների արդյունքում եկել եմ այն եզրակացության, որ պետք է ինստիտուտ լինի, որ աշխատի, որովհետև վարչապետի հանձնարարականով կամ քաղաքական մեծամասնության կամքով չի, թող ինստիտուտ լինի ու աշխատի։ Եվ մենք 2020-2021 թվականներին շրջադարձային նշանակության բարեփոխումներ ենք իրականացնել։ Մենք պետք է գնանք այդ ճանապարհով՝ պետություն-ինստիտուտ, պետության-ինստիտուտ։ Ոչ մի էմոցիա, ով ում շատ է  սիրում, ով ում քիչ է սիրում, հարգում է, չի հարգում, այս ամենը պետք է դնել մի կողմ»։

Նիկոլ Փաշինյանը նաև ուշադրություն հրավիրեց այն փաստի վրա, որ նախորդ ամիս «Զանգեզուրի պղնձամոլիբդենային կոմբինատի» գործով պետական բյուջե է վճարվել 15 միլիարդ դրամ։

«Հայաստանի Հանրապետությունը, ժողովուրդը, բոլորը  Զանգեզուրի պղնձամոլիբդենային կոմբինատի սեփականատեր է, դա թալանածի վերադարձ չէ՞։ Դա էլ է թալանածի վերադարձ»,- ասաց նա։