Ձեր վստահելի աղբյուրը

Արցախի Հանրապետության նախագահ Արայիկ Հարությունյանը հայտարարել է, որ Արցախի կարգավիճակի վերաբերյալ Ադրբեջանի առաջարկներն անընդունելի են։ Մարտակերտ քաղաքում շրջանի վարչակազմի պատասխանատուների, համայնքների ղեկավարների և բնակչության ակտիվ ներկայացուցիչների հետ հանդիպմանը քննարկվել են աշխարհաքաղաքական վերջին զարգացումները և այդ համատեքստում Արցախում տիրող ռազմաքաղաքական իրավիճակը, անվտանգային և սոցիալ-տնտեսական խնդիրները։

«Մենք հասկանում ենք, որ պետք է ապրենք հարևանությամբ, բայց մյուս կողմից ենթակայություն՝ հնարավոր չէ, անթույլատրելի է։ Տարբերակը, որով մենք պետք է առաջնորդվենք, սա մեր կարծիքն է,  ստատուս քվոն պահպանելն է, ինչպես ռուսներն են ասում։ Ռուս խաղաղապահ ուժերը շարունակելու են մնալ այստեղ անժամկետ, քանի որ նրանք եկել են այստեղ նաև որպես Արցախում ապրող հայ բնակչության անվտանգության երաշխավոր»,-ասել է Ա. Հարությունյանը։

Նրա խոսքով,  պետք է շարունակել ապրել այստեղ՝ ունենալով դե ֆակտո անկախություն և ձգտելով դե յուրե հետագա փոփոխության. «Դա կարող է լինել անկախություն, դա կարող է լինել Հայաստանի հետ միացում, որը քիչ հավանական եմ համարում, բայց դա կարող է լինել նաև Ռուսաստանի հետ ինչ–որ հարաբերություններ ուղղակի ուղղահայացի շրջանակներում»։

Նա վերահաստատել է Արցախի իշխանությունների  հավատարամությունը  ժողովուրդների ինքնորոշման իրավունքի հիման վրա անկախության և պետականաշինության  համար պայքարին։