Ձեր վստահելի աղբյուրը

«Այստեղ խնդիրը տեխնիկական է, քանի որ հեռարձակման հաճախականությունը սահմաններ չի ճանաչում և այլ երկրների ազդակները կարող են գալ մեր երկիր, ինչպես նաև մեր ազդակները գնան հարակից պետություններ»,- պատասխանելով ադրբեջանական և թուրքական ռադիոհաճախականությունների՝ Հայաստան ներթափանցելու մասին ՔՊ պատգամավոր Լուսինե Բադալյանի հարցին՝ ասաց ՀՌՀ նախագահ Տիգրան Հակոբյանը:

Նրա խոսքով՝ Հայաստանը մի քանի բողոք է ստացել Իրանից, որ Հայաստանից իրենց ոչ հաճելի բովանդակությամբ ռադիոներ են հեռարձակվում ԻԻՀ-ի տարածքում:

ՀՌՀ նախագահը խնդիրն ավելի շատ տեսավ Բարձր տեխնոլոգիական արդյունաբերության նախարարության և գործադիրի այլ լիազոր մարմինների տիրույթում:

Տիգրան Հակոբյանի տեղեկացմամբ՝ Հանրային հեռուստաընկերությունը Շիրակի մարզում ուժեղացրել է իր հաղորդիչները և այնտեղ թուրքական ռադիոների ազդեցությունը բավականին նվազել են:

Նա նաև հայտնեց, որ տեղեկատվության անվտանգությունը պահանջում է սահմանների վրա օտար ռադիոհաճախականությունների արգելքներ դնել, բայց այն ՀՌՀ լիազորությունների մեջ չէ, քանի որ այդ կառույցը նման կարողություններ չունի: