Ձեր վստահելի աղբյուրը

Ռուսաստանի Դաշնության արտաքին գործերի նախարարության կայքում հրապարակված է ՌԴ ԱԳՆ պաշտոնական ներկայացուցիչ Մարիա Զախարովայի մեկնաբանությունը՝ հայ պատգամավորներին Արցախի Հանրապետություն մուտքն արգելելու վերաբերյալ։

Հարց ու պատասխանը՝ ստորև.

-Ինչպե՞ս կարող եք մեկնաբանել վերջին օրերին հայ խորհրդարանականների՝ ռուսական խաղաղապահ զորախմբի պատասխանատվության գոտի մուտքն արգելելու հետ կապված խնդիրները։

– Ռուսական խաղաղապահ զորախումբը (ՌԽԶ) գործում է Ռուսաստանի, Ադրբեջանի և Հայաստանի ղեկավարների 2020 թվականի նոյեմբերի 9-ի հայտարարության դրույթներին համապատասխան։ Նշված այցը նախկինում համաձայնեցված չի եղել ՌԽԶ հրամանատարության հետ։

Մենք կարծում ենք, որ ռուս խաղաղապահների գործողությունների մասին հայտարարությունները, որոնք իբր հակասում են 2020 թվականի նոյեմբերի 9-ի հայտարարության դրույթներին, չեն համապատասխանում իրականությանը։ Մենք ակնկալում ենք, որ հաշվի առնելով ինչպես ՌԽԶ պատասխանատվության գոտում, այնպես էլ հայ-ադրբեջանական սահմանի առանձին հատվածներում տեղի ունեցած միջադեպերը, երկու կողմերն էլ ձեռնպահ կմնան տարածաշրջանում իրավիճակն էլ ավելի սրող քայլերից։

Հիշեցնենք, որ երեքշաբթի առավոտյան Ազգային ժողովի ընդդիմադիր «Հայաստան» և «Պատիվ ունեմ» խմբակցությունները որոշել են բոյկոտել խորհրդարանի քառօրյան և մեկնել Արցախի Հանրապետություն։ Ավելի ուշ ԱԺ պատգամավոր Իշխան Սաղաթելյանը ֆեյսբուքյան իր էջում հայտնել էր, որ իրենց թույլ չեն տվել մուտք գործել Արցախ։