Ձեր վստահելի աղբյուրը

«Ապրիլի 13-ին և 14-ին Նիկոլ Փաշինյանի ելույթները Ազգային ժողովում հայոց երրորդ հանրապետության վերջն է, Փաշինյանը երրորդ հանրապետության գերեզմանափորն է, նույնիսկ ինչ-որ իմասով հպարտանում է այդ դերով»,- «Այլընտրանքային նախագծեր» խմբի կազմակերպած «Հայկական օրակարգ. Ինչպես Հայաստանին տալ զարգացման նոր հույս և հեռանկար» թեմայով քննարկմանն ասաց հասարակական-քաղաքական գործիչ, «Արար» հիմնադրամի հիմնադիր Ավետիք Չալաբյանը։

Նրա խոսքով, այն տրամաբանությունը, որի վրա  հիմնվել էր հայոց երրորդ հանրապետությունը, նրա ելույթով վերջացավ։ Չալաբյանը նշեց, որ Փաշինյանի սկսած գործընթացը տանում է պետության աստիճանական, գուցե նույնիսկ շատ արագ կազմաքանդման։

«Այսօր մեր առջև իսկապես կանգնած է այլընտրանք՝ արդյոք կստեղծենք այդ չորրորդ հանրապետությունը, թե Հայաստանը որպես պետություն կդադարի գոյություն ունենալ»,- ասաց քաղաքական գործիչը։

Նա նշեց, որ կոռուպցիայի դեմ պայքարի անվան տակ եկավ Փաշինյանը, բայց նրա օրոք ամեն ինչ շատ ավելի վատ դարձավ, իմիտացիան դարձավ համատարած։

«Այս տարիների ընթացքում աշխատել եմ պաշտպանության նախարարության հետ, տեսել եմ՝ ինչ էր տեղի ունենում, Փաշինյանի գալուց հետո ինչ է։ Եթե մինչ այդ հրամանատարները  որոշակի նախաձեռնողականություն ունեին, պարաստ էին գնալ դիրքեր, ամրապնդել, կառուցել, սպառազինություն մշակել, Փաշինյանի գալուց ի վեր դա բացարձակ կանգնեց։ Փոխել են միջին մակարդակի հրամանատարների, պաշտպանական համակարգը սարքեցին խոցելի պատերազմի առաջ»,- ասաց Ա. Չալայանը՝ ընդգծելով, որ մարտական գործողությունների դադարից հետո՝ 1,5 տարի է Փաշինյանի իշխանությունը հետևողականորեն կազմալուծում է բանակը։ Նրա խոսքով, Արցախի պաշտպանության բանակը կազմալուծվում է, որովհետև Հայաստանից այնտեղ այլևս զինակոչիկներ չեն գնում, թեև ոչ մի տեղ գրված չէ, որ այդպես պետք է լինի, այլ Փաշինյանի անձնական որոշումն է։

«Փաշինյանի իշխանության ամեն օրը բերում է նրան, որ մենք դառնում ենք ավելի անպաշտպան։  Մեր երկիրը կռվող երկիր է։ Պատերազմում պարտվել ենք, ըստ էության,  մինինալ տարբերությամբ։ Ադրբեջանը 12 հազար զոհ է տվել։ Մեր բանակի անձնակազմի 5 տոկոսն ենք մենք կորցրել պատերազմում։ Ամեն մի կյանքի կորուստը ողբերգություն է, բայց Փաշինյանն մեզ ուզում է  համոզի, որ մենք բանակ չունենք։ Մենք  ունենք բանակ, պարզապես շարունակում է  բանակը կազմաքանդի, որպեսզի մեզ բերի  անպաշտպանության վիճակի»,- նշեց քաղաքական գործիչը։

Ըստ նրա, այսօր գերնպատակը պետք է լինի այս իշխանությանը փոխելը, ստեղծել ազգային իշխանություն, որը  կգնա խելամիտ պաշտպանության ճանապարհով, իսկ դրա ռեսուրսները երկիրն ունի։

«Բայց կա կարևոր նուանս. համոզված եմ՝ այս իշխանությունն ամեն ինչ անելու է սադրի Ադրբեջանին, նաև Թուրքիայի, որ Հայաստանում, Արցախում  ինտերվենցիա իրականացնի, ինչպես արեց Փառուխում։

Փառուխ-Խրամորթ հատվածից 5 դիրքերն իր հրամանով են հանձնվել,  հայկական ուժերը դուրս են եկել այդ դիրքերից, թույլ են տվել, որ ադրբեջանցիները մտնեն այդտեղ։ Դա հատուկ սադրանք էր, որ իրականացրել է Փաշինյանը, որպեսզի այսօր մեզ ահաբեկի։ Չեմ  բացառում, որ  նորանոր այդպիսի սադրանքներ իրականացնի, որպեսզի մեր ահաբեկումը շարունակվի»,- նշեց Չալաբյանը։
Նա համոզված է, որ ազգային իշխանությունը կարող է Փառուխն էլ, Սև լիճն էլ, Ներքին Հանդեն էլ հետ բերի, ադրբեջանցիներն առանձնապես կռվի ընդունակ չեն։

Ա. Չալաբյանի կարծիքով, այն սահմանագիծն է, որ միայն գրչով, խոսքով, մտքով հնարավոր չէ հասնել  այս իշխանության հեռացնելուն, իրականությունը փոխելուն, այլ դա կլինի գործողությամբ, նաև զենքով։

Նա նաև կարծում է, որ երեկվանից սկսած Փաշինյանն այլևս իշխանություն չէ, ֆորմալ է իշխանություն. «Նա արդեն առաջին դեղին քարտն է ստացել Արցախի Ազգային ժողովից, դա անվստահություն էր։ Կարծում եմ՝ մեր բոլորի խնդիրը պետք է լինել դելեգիտիմիզացնել Փաշինյանի իշխանությունը իրավական մեթոդներով»։

Նրա խոսքով, մարդիկ համատարած հիասթափության մեջ են, հասկանում են, որ Փաշինյանը վերջին 30 տարվա պատմության մեջ մեծագույն խաբեություն է, մարդիկ չեն ներելու նրան։
«Փաշինյանի իշխանության հոգեվարքն արդեն սկսվել է։ Նա ինձ համար այլևս որևէ լեգիտիմություն չունի»,- ասաց Ա. Չալաբյանը։