Ձեր վստահելի աղբյուրը

«Նախագծով առաջարկվում իրականացնել բնակարանների և բնակելի տների էներգոարդյունավետ վերանորոգման պետական աջակցության ծրագիր»,-կառավարության նիստում հայտնեց  քաղաքաշինության կոմիտեի նախագահ Արմեն Ղուլարյանը՝ ներկայացնելով որոշման նախագիծը:

Նա պարզաբանեց, որ ծրագրի շրջանակներում նախատեսվում է բնակարանների և տների էներգոարդյունավետ վերանորգման վարկի  տրամադրում և նրանց տարեկան տոկոսադրույքի ամբողջական կամ մասնակի սուբսիդավորում:

Արմեն Ղուլարյանի խոսքով՝ ծրագիրը տարածվում է բոլոր բնակարանների վերանորոգմանը՝ բացառությամբ 4-րդ կարգի վնասվածություն ունեցողների:

«Էներգոարդյունավետ է համարվում այն վերանորոգումը, որի ընդհանուր արժեքից էներգոարդյունավետությա բարձրացման միջոցառումներին է ուղղվում բնակարանների առնվազն 20%-ը և բնակելի տների դեպքում 30 %-ը»,-հայտնեց քաղաքաշինության կոմիտեի նախագահը:

Նրա խոսքով՝ բազմաբնակարան շենքերի համար վարկի սահմանաչափը պետք է լինի ոչ ավել քան 7 մլն դրամը, իսկ անհատական բնակելի տների համար՝ ոչ ավել քան 10 մլն դրամը, որոնք տրամադրվում են ՀՀ դրամով, ոչ ավել քան 14%-ով և առավելագույնը 7 տարի ժամկետով:

«Սահմանամերձ կամ բարձր լեռնային հատվածում վերանորոգվող գույքերի մասով սուբսիդավորումը կտրամադրվի այնպիսի չափով, որ վարկը տրամադրվի 0 % տոկոսադրույքով, Սահմանամերձ բնակավայար չհանդիսացող գյուղական բնակավայրերում 2 % տոկոսադրույքով, քաղաքակային բնակավայրերում 3 %-ով և Երևան քաղաքում այն կկազմի 5 %»,-ասաց Ղուլարյանը և տեղեկացրեց, որ ծրագիրն իրականացնելու համար մինչև այս տարվա մայիսի վերջ կմշակվի ծրագրի իրականացման կարգը:

Ըստ նրա՝ կարգն ուժի մեջ մտնելուց հետո թվով 10 հազար վարկ կտրամադրվի մինչև 2023 թվականի հուլիսի մեկը: