Ձեր վստահելի աղբյուրը

«Ես Ազատության հրապարակ եմ եկել որպես ՀՀ քաղաքացի Արթուր Վանեցյան։ Պահն օրհասական է։ Յուրաքանչյուր քաղաքացուց է կախված՝ կունենա՞նք Հայաստանի Հանրապետություն, կունենա՞նք Արցախ։ Սա քաղաքական պայքար չէ, սա հանուն հայրենիքի պայքար է»,-Ազատության հրապարակում լրագրողների հետ զրույցում ասաց «Հայրենիք» կուսակցության նախագահ Արթուր Վանեցյանը։

Նա ևս մեկ անգամ կրկնեց՝ մնալու է Ազատության հրապարակում։

«Յուրաքանչյուրդ մտածեք, որ հենց ձեզանից է կախված Հայաստանի ու Արցախի ապագան, յուրաքանչյուրից է կախված՝ կունանա՞նք երկիր, պետություն, պետականություն, թե՞ ոչ։ Յուրաքանչյուրից է կախված, այս տարածքում մենք կունենանք ինքնիշխան պետություն, թե՞ կլինեն ինչ-որ պետության կցորդ։ Մենք հայրենիք չունենք, որը կարող ենք հանձնել թշնամուն։ Չենք կարող թույլ տալ, որ ինչ-ինչ պատճառաբանություններով հայրենիքը հանձնեն թշնամուն»,-ասաց Վանեցյանը։

Նա նշեց, օրվա ընթացքում Ազատության հրապարակում են եղել դասախոսներ, գեներալներ, գիտնականներ, պատգամավորներ, քաղաքացիներ։

«Ես կոչ եմ անում մարդկանց համախմբվել Հայաստանի ու Արցախի դրոշների ներքո։ Մենք ԱԺ-ում լսեցինք մի ելույթ, որն ամենախայտառակն էր Երրորդ Հանրապետության պատմության մեջ։ Հետագայում այն պատմության գրքերում լինելու է խայտառակության, պարտվողականության, օտարի շահերը սպասարկելու մասին»,-ասաց Վանեցյանը։