Ձեր վստահելի աղբյուրը

«Խաղաղության օրակարգը պարտադրանքով չի լինում, խաղաղության փաստաթուղթ կոչեցյալը պետք է լինի լեգիտիմ»,-Ազատության հրապարակում լրագրողների հետ զրույցում հայտարարեց ԱԺ «Պատիվ ունեմ» խմբակցության պատգամավոր Թագուհի Թովմասյանը, որը Ազատության հրապարակում էր։

Նրա խոսքով, չեն կարող պարտադրանքով փաստաթուղթ ստորագրել տան, և ասեն, որ այն ընդունելի է բոլոր կողմերի համար։

«Փաստացի մեզ ուժի, պատերազմի սպառնալիքի ներքո պարտադրում են խաղաղություն։ Ինչո՞ւ ենք մենք այդ մեկ կողմի պարտադրանքը կատարում»,-ասաց Թովմասյանը։

Նրա խոսքով, չկա որևէ մարդ, որ չի ցանկանում խաղաղություն, սակայն պետք է հասկանանք, թե որն է խաղաղության գինը։

«Եթե դա արվում է Արցախի ու արցախահայության հաշվին, արդյո՞ք դա է մեր երազած խաղաղությունն ու Հայաստանի պետական շահը։ Ես կարծում եմ, որ խաղաղությունը պետք է լինի արժանապատիվ, դրան պետք է հասնել երկու կողմերի փոխհամաձայնությամբ։ Միայն այդ պայմաններում մենք կարող ենք խոսել լեգիտիմ փաստաթղթի մասին»,-նշեց նա։

Նա ընդգծեց՝ պիտի թույլ չտանք, որ այսօրվա իշխանությունը Արցախը նվիրի թշնամուն, և պիտի դիմենք վճռական գործողությունների թե՛ Հայաստանում և թե՛ Արցախում։

Անդրադառնալով Արթուր Վանեցյանի նախաձեռնած պայքարին, նա կոչ արեց միանալ դրան։

«Ցույց տանք, որ հայ ժողովուրդը արժանապատիվ է, և մեր անունից ոչ ոք չի կարող հակահայ որոշումներ կայացնել։ Վճռական գործողությունների մեկնարկը տրված է»,-ասաց նա։