Ձեր վստահելի աղբյուրը

«Եկել ենք տեսնելու մեր պատգամավոր գործընկերոջը, ընկերոջը, ով իր բողոքի ակցիան է անում այս վերջին իրադարձությունների դեմ՝ Հայաստանի՝ դեպի թուրքացման տանող ճանապարհի, Արցախի հայաթափման, ադրբեջանականացման»,-Ազատության հրապարակում լրագրողներին ասաց ԱԺ «Հայաստան» խմբակցության ղեկավար Սեյրան Օհանյանը։

Հիշեցնենք, որ «Պատիվ ունեմ» խմբակցության ղեկավար, «Հայրենիք» կուսակցության նախագահ Արթուր Վանեցյանն Ազատության հրապարակում հայտարարեց անժամկետ բողոքի ակցիաների մեկնարկի մասին, քաղաքացիներին հրավիրեց հրապարակ։

Ս. Օհանյանի կարծիքով, յուրաքանչյուրի հայի պարտականությունն է միանալ այդ պայքարին, թույլ չտալ այս իշխանությունները կուրորեն Հայաստանը տանեն թուրք-ադրբեջանական խաբկանքի, խորամանկության մեջ, Արցախը տանել հայաթափման։

«Այս իշխանությանը որևէ մեկը մանդատ չի տվել միայնակ որոշել Արցախի կարգավիճակը»,- ընդգծեց ընդդիմադիր գործիչը։

Նա հարցադրում արեց՝ այս վեջին ժամանակաշրջանում Նիկոլ Փաշինյանին որևէ մեկը տեսե՞լ է բանակում, սահմաններում։

«Անընդհատ ոստիկանական զորքերում է՝ այստեղ, Գյումրիում։ Ինքը մտածում է սեփական անվտանգության մասին, ոչ թե երկրի ու ժողովրդի։

Այս մեկուկես տարում մատը մատին չեն տվել բանակի մարտունակությունը վերականգնելու, սահմանները ամրապնդելու համար, թող մեծ-մեծ չխոսեն։

Եթե ինքը փորձում է վախեցնել ժողովրդին ու ասել՝ խաղաղության չգնալը պատերազմ է, ի՞նչ ես դու արել այս մեկուկես տարում, որպեսզի պատերազմ չլինի, ի՞նչ եք արել,  որպեսզի բանակի մարտունակությունը վերականգնեք։ Ոչինչ չեք արել։ Սա ցավով եմ ասում, որովհետև բանակն իմ հարազատ կառույցն է»,- ասաց Ս. Օհանյանը։

Նա նշեց, որ այս առանձին ակցիաները մաս են կազմելու հետագայում ընդհանուր դիմադրության շարժում ձևավորելուն և թույլ չտալուն, որպեսզի այս իշխանությունները մեր երկիրը, ժողովրդին տանեն թուրքահպատակության։

«Այս շարժումը մեկ մարդու, մեկ ուժի, մեկ օրվա, մեկ ամսվա շարժում չէ, պետք է համախմբել բոլոր ուժերը, պետք է շարժմանը մասնակից լինեն բոլորը»,- ասաց «Հայաստան» խմբակցության ղեկավար Ս. Օհանյանը։