Ձեր վստահելի աղբյուրը

«Ես չեմ ստանձնել ընդդիմադիր գործիչներից  ընդդիմադիր գործողությունների դեմքը լինելու պարտավորությունը։ Ես՝ որպես ՀՀ քաղաքացի, եկել եմ և իմ խոսքն եմ ասել, իմ բողոքի ձայն եմ բարձրացրել՝ փորձելով մարդկանց ուշադրությունը գրավել այս իրավիճակին» ,- Ազատության հրապարակում, մամուլի ասուլիսի ընթացքում պատասխանելով լրագրողների հարցերին հայտարարեց «Պատիվ ունեմ» խմբակցության ղեկավար, «Հայրենիք» կուսակցության նախագահ Արթուր Վանեցյանը։

Վանեցյանի փոխանցմամբ՝ այս մեկ օրվա ընթացքում գրեթե բոլոր ընդդիմադիր կուսակցության ներկայացուցիչներն, այդ թվում՝ Խորհրդարանական ընդդիմության, այցելել են իրենև եղել են իր կողքին։

«Ես ձեզ հավաստիացնում եմ, մեր բոլորիս նպատակը նույն է, բայց որոշել ենք պայքարն իրականացնել ապակենտրոն, ցանցային ճանապարհով»,- ասաց նա։

Շարունակելով խոսքը Վանեցյանը հայտնեց, որ ունենք հստակ գործողությունների պլան, որի ականատեսը կլինի հասարակությունը։

«Որոշ ժամանակ անց, ամենօրյա ռեժիմով ականատես կլինեք այս բողոքի ակցիայի և մեկնարկող այլ բողոքի ակցիաների զարգացմանն ու ընթացքին։ Համոզված եմ, որ ժողովուրդը, եթե մեզ հավատա և յուրաքանչյուրն իր  լուման ներդնի այս պայքարում,ապա շատ արագ կհասնենք արդյունքի։ Այս անգամ լրջագույն փոփոխություններ ենք ունենալու և հասնելու ենք մեր վերջնական նպատակին ։ Իսկ նպատակը ուժեղ Հայաստան, ուժեղ Արցախ, ինքնիշխան պետություն, տարածքային ամբողջականությունը պահպանված պետություն և լավ ապրող քաղաքացի ունենալն է»,- ասաց քաղաքական գործիչը։

Նպատակին հասնելու համար, ըստ Վանեցյանի, պետք է լուծել միջանկյալ մի խնդիր՝ այս իշխանություններին պետք է հեռացնել։ 

Ինչ վերաբերում է մանդատները վայր դնել, չդնելուն, ապա Վանեցյանն ասաց․

«Համարեք, դրել ենք։ Այստեղ ենք, փողոցում ենք, Խորհրդարանում չենք, կանգնած ենք գետնին, շփվում ենք ամեն օր ժողովրդի հետ։ Ես այլևս Խորհրդարանում ի՞նչ անեմ, ի՞նչ քննարկեմ, ինչի՞ մասին խոսեմ։ Մի խորհրդարանում, որտեղ հայտարարում են, որ «Արցախը կարող է լինել Ադրբեջանի կազմում» կամ «Արցախում ապրող հայը կարող է ապրել Ադրբեջանի կազմում», ես այդ Խորհրդարանում  այլևս չգիտեմ ինչով պետք է զբաղվեմ։ Այնպես որ մանդատը վայր դնելը կամ չդնելը տեխնիկական հարց է։ Այդուհանդերձ, իշխանափոխությունն իրականացվելու է Խորհրդարանում՝ փողոցի ճնշման տակ։

Եվ այդ մանդատները մեզ պետք են գալու՝ գործն ավարտին հասցնելու համար»։