Ձեր վստահելի աղբյուրը

«Մի խումբ մտավորականներ, քաղաքական-հասարակական գործիչներով նախաձեռնել էինք անժամկետ գործողությունների շարք, որի մեկնարկը տրվելու է վաղը՝ ապրիլի 19-ին, ժամը 12-ին Ազատության հրապարակում կազմակերպվող ասուլիսով»,- «Հայելի» մամուլի ակումբում հայտարարեց ՍԴ աշխատակազմի նախկին ղեկավար Էդգար Ղազարյանը և հավելեց, որ այդ գործողությունները կդադարեն այն ժամանակ, երբ Նիկոլ Փաշինյանը կվռնդվի իշխանությունից:

Նա նկատեց, որ նախորդ օրը հայրապետական պատարագ էր Սուրբ Գրիգոր Լուսավորչի մայր տաճարում, որին իշխանության ոչ մի ներկայացուցիչ չէր մասնակցում:

«Այն իր մեջ խորհուրդ ունի: Մենք հարգում ենք իշխանության ներկայացուցիչների զգացողությունը, որովհետև մինչև մայիսի 1-ը ռամադան է և իրենք բնական է, որ ռամադանի ընթացքում չէին կարող մասնակցել քրիստոնեական գլխավոր տաղավար տոներին, հայրապետական պատարագներին՝ առավել ևս»,- ասաց Ղազարյանը:

Արձանագրելով, որ Սուրբ Հարության տոնը մարդկանց հոգու վերածննդի օրն է՝ բանախոսն ասաց, որ 2018 թվականից հետո սպանվել է Հայաստանի հասարակության քաղաքական գիտակցությունը, մտածողությունը, պայքարի ձգտումը և հայտարարեց, որ ներկայում ՀՀ քաղաքացիներն ապրում են հարության, վերելքի շրջանը:

Էդգար Ղազարյանի խոսքով՝ աստվածային խորհրդով այս վերելքը զարթոնք է ապրելու, կյանք է ունենալու և այդ կյանքը հավիտենական է լինելու, ինչն էլ կազմակերպվող անհնազանդության արշավի խորհուրդն է:

Անդրադառնալով Արթուր Վանեցյանի նախաձեռնած անժամկետ ակցիային՝ բանախոսն ասաց. ««Հայրենիք» կուսակցությունը հայրենիքի գողին հայրենիքից վռնդելու ակցիա է անցկացնում»:

Նա Նիկոլ Փաշինյանին հայրենիքի գող է համարում, քանի որ վերջինս իրենից հայրենիք է գողացել:

«Սա ապօրինի իշխանություն է՝ թշնամու շահերը սպասարկող ապօրինի իշխանություն է, Նիկոլ Փաշինյանից մեծ թալանչի հայ ժողովրրդի պատմության մեջ գոյություն չի ունեցել»,- հայտարարեց Ղազարյանը և փաստերով հիմնավորելով, որ պատերազմի հետևանքով Փաշինյանը 25 մլրդ դոլարի վնաս է արդեն հասցրել ՀՀ-ին, հավելեց. «2020 թվականի նոյեմբերի 9-ից հետո Նիկոլ Փաշինյանը գնացել վեր էր ընկել ՊՆ բունկերում, եթե նա այնտեղից դուրս չգար, մենք չէինք ունենա այսօրվա մարտահրավերները, սրա ամեն օրն աղետ է մեր ժողովրդի համար»:

Նա բացատրեց, որ եթե խաղաղության պայմանագիրը կնքվի ապա հաջորդ օրն Ադրբեջանը կփակի Բերձորի միջանցքը, կասի, որ Հայաստանը ճանաչել է իր սահմանները, խաղաղապահներին էլ կհրավիրի դուրս՝ ասելով, որ կոնֆլիկտ այլևս չկա և արցախցիներին կստիպի ապրել ադրբեջանական դրոշի ներքո:

Էդգար Ղազարյանըի խոսքով՝ որպեսզի նման բան տեղի չունենա, արցախցիները պետք է գան այսօր Երևան և մասնակցեն անժամկետ ցույցերին:

Նույն կոչով նա դիմեց սյունեցիներին, հիշեցնելով, որ Ադրբեջանի դրոշը Կապանի մարզպետարանից հեռու է 600-800 մետր և այն Ադրբեջանի դիրքերից մարզպետարանի կտուր տեղափոխելը 15 րոպե է, առավել ևս, երբ Ալիևը հայտարարել է, որ Սյունիքը պատմական ադրբեջանական տարածք է:

«Սեպտեմբերին, Սելիմի լեռնանցքից, Վարդանյաց լեռներով մեր սարքած ճանապարհից, Եղեգնաձոր գետափի խաչմերուկից այն կողմ դառնալու է Ադրբեջան, եթե այս մարդը մնաց Հայաստանի ղեկավար»,- հայտարարեց ՍԴ աշխատակազմի նախկին ղեկավարը և կոչ արեց բոլոր մարզերի քաղաքացիներին միանալ մայրաքաղաքում մեկնարկած անհնազանդության միջոցառումներին: