Ձեր վստահելի աղբյուրը

«Սկսած 1988 թ.-ից ես մասնակցել եմ շատ ցույցերի և երեկ Ազատության հրապարակում առաջին անգամ ոստիկանների դեմքերին, աչքերում և գործողություններում տեսա նման ագրեսիա և ատելություն»,-անդրադառնալով նախորդ օրն Արթուր Վանեցյանի կազմակերպած բողոքի ակցիայիայի ժամանակ ոստիկանների պահվածքին՝ ասուլիսում հայտնեց քաղաքագետ Արմինե Ադիբեկյանը:

Նա տարակուսեց, թե՝ ո՞ւմ են ատում ոստիկանները, այն դեպքում, երբ ի պաշտոնե պարտավոր են պաշտպանել ժողովրդին:

«Մենք այս երկրի քաղաքացիներն ենք և ունենք պահանջներ, դրանք հանրայնացնելու, սահմանադրությամբ ամրագրված ցույցեր, ակցիաներ անցկացնելու իրավունքներ: Այդ եռանդը, որով դուք պալատկեքը գրկած վազում էիք, ձեզ ի՞նչ լավ բան տվեց»,-ասաց քաղաքագետը:

Ադիբեկյանի խոսքով՝ նախորդ օրն Ազատության հրապարակում զրուցել է ոստիկանության նախկին բարձրաստիճան սպայի հետ, որը համակարգից դուրս է եկել 2018 թվականից և նա հայտնել է, որ ոստիկանությունում այսօր մնացել են նրանք, ում Փաշինյանը մարդ է դարձրել:

«Փողոցից հավաքել են անգրագետ մարդիկ, որոնք ոչ մի հեռանկար չունեին: Պրոֆեսիոնալների կողմից ոստիկանության համակարգը լքելուց հետո առաջացած բացերն այդ թափթփուկներով է լցրել և, իհարկե, Նիկոլն իրենց համար հաջողության, ապահով ապրելու, ստաբիլ աշխատավարձի երաշխավորողն է: Հետևաբար՝ նրանք ատում են մեզ, որովհետը մենք վտանգում ենք նրանց բարեկեցիկ կյանքը՝ թեկուզ ևս 1-2 տարի մսով ճաշ ուտելու հնարավրությունը, կամ իրենց մարդ զգալը: 4 տարի առաջ նրանք ընդամենը կիսագրագետ թափթփուկներ էին: Սա ոչ մի լավ բան չի խոստանում, քանի որ դրանք այն մարդիկ են, որոնք մեկ հրահանգով կարող են զենք բարձրացնել մեր վրա: Բայց այն չպետք է վախեցնի մեզ: Եթե մենք այսօր վախենում ենք պաշտպանել մեր երկիրը նման դավաճանից, որը մեր երկիրը ծնկի բերեց, պառակտեց հասարակությանը, եթե այսօր սրան չհեռացնենք, ապա վաղը կամ մյուս օրը Նիկոլ Փաշինյանի տեղը զբաղեցնելու է Հեյդար Ալիև կրտսերը, որպես «Էրմենիստան» ռայոնի գործադիր կոմիտեի ղեկավար. սա մեր ամենաակնկալելի և տեսանելի ապագան է»,-հայտարարեց Արմինե Ադիբեկյանը:

Ըստ քաղաքագետի՝ ամենասարսափելին առջում է և ամեն ինչ պետք է անել, որ խափանվեն այդ զարգացումները, դրա համար ժողովուրդը պետք է կանգնի և պատնեշ ստեղծի նման ապագայի առաջ:

«Ով ուզում է իր երեխային մատաղ անի, խնդրեմ գնացեք ապրեք Շուռնուխում, Դավիթ Բեկում, Ներքին Խնձորեսկում, Ճակատենում, խաղաղություն կերտեք, ցույց տվեք, թե ինչպես է լինում, երբ թուրքն ավտոմատը պահում է քո երեխայի վրա  և դու երջանիկ խաղաղություն ես կերտում: Թող գնան 2-3 տարի ապրեն այդ բնակավայրում և վայելեն իրենց խաղաղությունն ամբողջ ծավալով»,-ասաց Արմինե Ադիբեկյանը և, վերլուծելով հասարակական տրամադրությունները, հավելեց. «Գործող վարչակազմը 4 տարի աշխատել են հասարակությունը պառակտելու ուղղությամբ, այն իրենց հաջողվել է, այսօր մարդիկ չեն հավատում միմյանց: Նույն խնդիրն ունի նաև ընդդիմությունը՝ մտածելով,  թե արդյո՞ք կարող է վստահել այն մարդկանց, որոնք 2018 թվականին Նիկոլ են գոռացել, հիմա եկել են պայքարելու նրա դեմ: Բայց այդ անվստահությունը և մյուս հարցերը պետք է թողնել մի կողմ և հասկանալ, որ պաշտպանում են երկրի գոյություն ունենալու հնարավորությունը, և ամեն ինչ թողած համախմբվեն, գան ու կանգնեն Ազատության հապարակում»:

Անդրադառնալով իշխանության ներկայացուցիչների՝ վեհ գաղափարներից խոսելու փորձերին՝ քաղաքագետն ասաց. «Նրանք, ովքեր խոսում են վեհ գաղափարներից, իրենց տակ ունեն մեծ կճուճով կեղտ, թող իրենց տակը մաքրեն, նոր գան մեզ հայրենասիրություն քարոզեն»: