Ձեր վստահելի աղբյուրը

Երևանի փողոցներում «Պատիվ ունեմ» խմբակցության ղեկավար Արթուր Վանեցյանն իր համակիրների հետ իրականացրեց իրազեկման քայլերթ։

Քայլերթի ընթացքում քաղաքացիներին կոչ էր արվում միանալ երթին և պայքարել հանուն ՀՀ և Արցախի գոյության և զարգացման։

«Միասին կանգնեցնելու ենք այս վայրէջքը։ Հարգելի քաղաքացիներ հաղթանակը լինելու է և շատ կարճ ժամանակում կարողանալու ենք լուծել մեր առջև ծառացած խնդիրները։ Դրա համար պետք է մեկ բան՝ միասնություն,կամք և պայքար»,- հայտարարեցին պայքարի մասնակիցները և կոչ անելով միանալ Ազատության հրապարակում ընթացող պայքարին։

Քայլերթի ընթացքում մասնակիցները վանկարկում էին՝ «Միացե′ք», «Միացե′ք»․․․
Երևանի կենտրոնական փողոցներով շրջելուց հետո ակցիայի մասնակիցները վերադարձան ազատության հրապարակ, որտեղ «Պատիվ ունեմ» խմբակցության ղեկավար Արթուր Վանեցյանը հայտարարեց․

«Այսօր իրականացրեցինք առաջին իրազեկման երթը։ երկու օր առաջ , երբ ես եկա Ազատության հրապարակ, հրապարակում միայնակ էի։ Այսօր այդքան շատ չենք, որքան սպասում էինք, բայց կանք և շատանալու ենք։ Մենք թույլ չենք տալու, որ որևէ մեկը մոռանա մեր նահատակված տղերքին, որևէ մեկն ուրանա մեր ազգային արժեքները։ Մենք՝ հայերս, լինելու ենք հզոր, ինքնիշխան, անկախ և ապրելու ենք լավ՝ մեր Մեծ հայրենիքում»։

Վանեցյանը նշեց, որ երթի ընթացքում ինքնաաբուխ ծնվել է մի կարգախոս, այն է՝ «Հայեր, միացե′ք», «Հայեր, միացե′ք»,որը շարունակեցին վանկարկել Ազատության հրապարակում։

Արթուր Վանեցյանը նաև հայտնեց, որ կշարունակի մնալ Ազատության հրապարակում այնքան,  մինչև այնտեղ գտնվող հայերի քանակը չհարյուրապատկվի։