Ձեր վստահելի աղբյուրը

«Նիկոլ Փաշինյանին իշխանությունից հեռացնելու կարևորագույն հիմքն այն է, որ նա չի կատարել իր նախընտրական խոստումները, այդ թվում 2021 թվականի խորհրդարանական ընտրությունների ժամանակ տվածները»,- Ազատության հրապարակում հրավիրած ասուլիսում հայտնեց «5165» շարժման անդամ Մենուա Սողոմոնյանը:

Բանախոսը հիշեցրեց, որ Փաշինյանն իր նախընտրական ծրագրում գրել էր՝ ճանաչելու է Արցախի ժողովրդի ինքնորոշման իրավունքը, բայց օրեր առաջ ԱԺ-ում հայտարարել է, որ Արցախի կարգավիճակի հարցում Հայաստանը պետք է նշաձող իջեցնի, իսկ նրա մերձավորներն էլ ասացին, թե Արցախի ժողովուդը Ադրբեջանի կազմում ապագա ունի:

Մենուա Սողոմոնյանի խոսքով՝ Նիկոլ Փաշինյանը դավաճանել է իր իսկ հայտարարած հեղափոխության արժեքներին՝ ժողովրդավարությանը, համերաշխությանը, անվտանգությանը, սիրուն և բոլոր այլ արժեքներին ու սկզբունքներին, որոնց հետևել են բազմահազարանոց քաղաքացիների բանակը:

«Փաշինյանը տապալել է պետական կառավարումն արտակարգ և ռազմական դրության ժամանակ: Համավարակով պայմանավորված արտակարգ դրության ժամանակ բազմահազար մահերի պատասխանատվությունը կրում է ինքը, որովհետև առողջապահական համակարգն այդ ընթացքում ճիշտ չի կառավարվել»,-  նշեց «5165» շարժման անդամը:

Իր այդ պնդումը հիմնավորելով՝ Սողոմոնյանն ասաց, որ համավարակն ամենաշատ տարածված երկրներից՝ Չինաստանից, Իտալիայից և Իրանից ուղևորափոխադրման հոսքը դեպի Հայաստան չի սահմանափակվել:

Նրա խոսքով՝ ռազմական գործողությունների ժամանակ էլ զորահավաք անցկացնելու փոխարեն տեղի են ունեցել ջոկատների և գյուղապետերի ղեկավարած կամավորական խմբերի կամավորագրումներ, սեփական զրահաբաճկոններով և սաղավարտներով ներկայանալու կոչեր, քաղաքացիական, ոչ կոմպետենտ անձանց ներկայություն հրամանատարաշտաբային կետերում, ի դեմս Նիկոլ Փաշինյանի, նրա կնոջ, փոխվարչապետի:

«Ժողովրդավարություն հաստատելու, իշխանությունների տարանջատումը և հավասարակշռությունն ապահովելու փոխարեն Նիկոլ Փաշինյանը մենաշնորհել է ողջ պետական իշխանությունը, այդ թվում՝ արտաքին և ներքին որոշումների կայացումը, օրենսդիր իշխանությունը գտնվում է նրա ամբողջական հսկողության ներքո: Այնտեղ նրա հրամանը կատարում է մեկ պառլամենտական խմբակցություն»,- հայտարարեց Մենուա Սողոմոնյանը և փաստեց, որ խորհրդարնում խմբակցությունները միմյանց հետ չեն աշխատում, իսկ օրենքներն ընդունվում են 2-3 ժամվա ընթացքում:

Ըստ բանախոսի՝ Նիկոլ Փաշինյանն ապօրինի եղանակով վերահսկողություն է հաստատել դատական իշխանության վրա, իսկ Սահմանադրական դատարանում փոփոխություններն արել է ԱԺ-ի միջոցով, այն դեպքում, երբ պետք է արվեր հանրաքվեի միջոցով:

«Հանրապետության նախագահը պետք է լիներ քաղաքականպես չեզոք, բայց նա ընտրվել է մեկ խմբակցության կողմից, որը քաղաքական պատասխանատվություն է ստանձնել այդ թիմի մեջ և եղել է գործադիր իշխանության ներկայացուցիչ»,- ասաց «5165» շարժման անդամը և հավելեց. «Փաշինյանը իշխանության բոլոր թևերի վրա հաստատել է տոտալ վերահսկողություն ի հեճուկս այն բանի, որ հեղափոխության ժամանակ խոստանում էր ապահովել իշխանությունների թևերի միջև տարանջատման, փոխզիջման և հավասրակշռության մեխանիզմներ»:

Նա հայտնեց, որ Փաշինյանը կազմաքանդել է պետական համակարգը և ցանկացած ձախողման դեպքում խուսափում է պատասխանատվությունից՝ մեղքը բարդելով տարբեր խմբերի և մարդկանց վրա և հիշեցրեց, որ նա պատերազմում պարտությունը վերագրում էր ԳՇ-ին, հրամանատարներին, զորքին, իսկ դիվանագիտական պայքարում իր միտումնավոր ձախողումները փորձում է արդարացնել միջազգային հանրության ճնշումներով: