Արմեն Գևորգյանի պաշտպանը միջնորդեց թույլ տալ նրան մեկնել Ստրասբուրգ․ դատարանը համաձայնեց

Իրավունք 15:46 19/04/2022

Արմեն Գևորգյանի պաշտպանը միջնորդեց թույլ տալ նրան մեկնել Ստրասբուրգ․ դատարանը համաձայնեց

«Հայաստան» խմբակցության պատգամավոր Արմեն Գևորգյանի պաշտպան Լուսինե Սահակյանը միջնորդել է թույլ տալ իր պաշտպանյալին ապրիլի 23-29-ը բացակայել երկրից։ Նա տեղեկացրել է, որ ապրիլի 25-28 Ստրասբուրգում կայանալու են ԵԽԽՎ լիագումար նիստերը, որին Արմեն Գևորգյանը պետք է մասնակցի։

Ռոբերտ Քոչարյանի փաստաբանական թիմից հայտնում են, որ պաշտպանը դատարանին է ներկայացրել նաև ԱԺ-ի համապատասխան փաստաթղթերը։ Բացի այդ, Սահակյանը տեղեկացրել է, որ հաշվի առնելով նախկինում մերժված նմանատիպ միջնորդությունները, ԵԽԽՎ նախագահն անձամբ է միջնորդել պաշտպանել Արմեն Գևորգյանի անձեռնմխելիությունը։

Նախագահող դատավոր Աննա Դանիբեկյանը հայտարարել է, որ այս պահին անձեռնմխելիության հարց չի քննարկվում, և ԵԽԽՎ նախագահի նամակը որևէ առնչություն չունի ներկայացված միջնորդության հետ։

ՀՀ երկրորդ նախագահ Ռոբերտ Քոչարյանի պաշտպան Արամ Օրբելյանը միացել է միջնորդությանը, նշելով, որ միջազգային խորհրդարանական մարմինների աշխատանանքերին մասնակցելու հնարավորություն պետք է ունենան ինչպես իշխանական, այնպես էլ ընդդիմադիր քաղաքական գործիչները։

«Ֆիզիկապես մասնակցելու հնարավորություն չտալը ևս մեկ անգամ կվերահաստատի իմ այն պնդումը, որ տեղաշարժի ազատության սահմանափակումն այլ նպատակներ ունի», - ասել է Օրբելյանը։

Մեղադրանքը պաշտպանող դատախազ Պետրոս Պետրոսյանը նկատել է, որ ԵԽԽՎ նիստին կարելի է մասնակցել նաև հիբրիդային եղանակով, ինչին պաշտպան Սահակյանն արձագանքել է, որ հիբրիդային եղանակով Արմեն Գևորգյանը չի կարող հանդիպել որևէ պատվիրակի հետ։

Հաշվի առնելով, որ Արմեն Գևորգյանը պատրաստվում է ԵԽԽՎ-ում բարձրացնել Արցախյան հակամարտության վերաբերյալ հարցեր, դատարանը վերջապես թույլ է տվել ընդդիմադիր պատգամավորին մեկնել Ստրասբուրգ։

Հարակից հրապարակումներ`

Դատարանն անցավ ապացույցների հետազոտման կարգի սահմանմանը

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: