Ձեր վստահելի աղբյուրը

Ազատության հրապարակում այս պահին հասարակական-քաղաքական շատ գործիչներ կան։

5165 շարժման նախաձեռնող խմբի անդամ Մենուա Սողոմոնյանից լրագրողները հետաքրքրվեցին՝ այսօր ժամը 17-ին ԱԳՆ շենքի դիմաց նախատեսված բողոքի ակցիայի մանրամասներից։

«Մեր անհամաձայնությունն ենք հայտնելու վարվող արտաքին քաղաքականության հետ։ Իրականացնելու ենք իրազեկման ակցիա ուսանողների շրջանում։ Ուզում եմ շեշտել, որ բուհերի կողքով անցնելիս նպատակ չունենք դասապրոցեսը  խաթարել, չնայած Արցախն ավելին է, քան ցանկացած դասապրոցես։ Այսօր այս պահին դրությամբ մենք բուհի ներս չենք մնալու, երկար չենք մնալու բուհերի առջև, իրազեկման ակցիաներ ենք անելու, ովքեր կցանկանան, կարող են այդ պահին միանալ կարմիր ժապավեն ակցիային»,-ասաց Սողոմոնյանը։

Նրա խոսքով, եթե ուսանողները կարող են նաև գալ ու իրենց աջակցությունը հայտնել Արցախի ու արցախցու ճակատագրով մտահոգ, անկախության սերնդին պայքարի դուրս գալու հորդորով հացադուլ հայտարարած Նվեր Կիրակոսյանին ու Արթուր Ավագյանին։

«Երիտասարդները, լինելով ազգի սերուցքը, չպետք է անմասն գտնվեն այս գործընթացներից»,-ասաց Սողոմոնյանը։

Նա հիշեցրեց՝ 5165 շարժումը հայտարարել է, որ դադարեցնում է քաղաքական կոմպոտենտը, միանում են հանուն հայրենիքի անվտանգության պայքարին։

«Մենք նկատում ենք հետաքրքրության մեծացում, դրական ազդակներ ու արձագանքներ ենք ստանում»,-ասաց Սողոմոնյանը։

Ազատության հրապարակում են նաև նույն շարժման հիմնադիր, Արցախի հերոս Մենուա Հովհաննիսյանի մայրը՝ Կարին Տոնոյանը, շարժման համակիր Էդգար Ղազարյանը, ԱԺ «Պատիվ ունեմ» խմբակցության պատգամավոր Թագուհի Թովմասյանը, քաղաքական-հասարակական  գործիչ Նաիրա Զոհրաբյանը։

Անժամկետ բողոքի ակցիաների մեկնարկի մասին հայտարարած «Հայրենիք» կուսակցության նախագահ Արթուր Վանեցյանը, ամփոփելով անցած չորս օրերի արձագանքները, նշեց՝ տեսնում է, որ հաջողության հասնելու ներուժ կա։

«Մարդիկ հասկացել են, թե ինչ է կատարվում մեր երկրում, ինչ սպառնալիքներ կան մեր երկրի համար։ Ես համոզված եմ՝ մարդիկ կմիանան, սպասում են գործողությունների։ Հստակ պլան ունենք, այս ակցիան տալիէ  իր պտուղները, դրա մասին խոսում են, օրակարգում այս թեման կա։ Ես ասել եմ՝ այստեղ եմ առանց կուսակցական դրոշների։ Ես ասում եմ, հայ մարդ, դուրս արի փողոց ու պայքարի քո արժանապատվության, անվտանգության համար։ Ես տեսնում եմ դրական արձագանքներ»,-ասաց Վանեցյանը լրագրողերի հետ զրույցում։

ԱԺ նախկին պատգամավոր Նաիրա Զոհրաբյանը, անդրադառնալով Մոսկվա մեկնելուց առաջ Փաշինյանի հետ հեռախոսազրույցում Շառլ Միշելի խոստացած օգնությանը, այն որակեց կաշառք Արցախը հանձնելու դիմաց։

Հիշեցնենք, որ ըստ պաշտոնական հաղորդագրության Փաշինյանը և Միշելը քննարկել են ԵՄ-ի Արևելյան գործընկերության տնտեսական և ներդրումային պլանի շրջանակներում Հայաստանին 2.6 միլիարդ եվրո հատկացնելու պայմանավորվածության կատարման ընթացքը, ընդգծել ներդրումային փաթեթով նախատեսված ծրագրերի արդյունավետ իրագործման կարևորությունը։

«Ամենայն պատասխանատվությամբ ասում եմ, երբ Նիկոլ Փաշինյանը ԱԺ-ում ասում էր՝ միջազգային հանրությունն ինձանից պահանջում է իջեցնել Արցախի կարգավիճակի նշաձողը, ինչը նշանակում է թողնել Արցախն Ադրբեջանի կազմում, դրա գինը այն կաշառքն է, որի նախօրեին հրապարակավ առաջարկեց Եվրոպական խորհրդի նախագահ Շառլ Միշելը։ Հիմա մենք կանգնած ենք պարզ ընտրության առաջ՝ կամ Արցախի ցեղասպանություն ու Հայաստանի ինքնիշխանության փուլային կորուստ, կամ Նիկոլ Փաշինյանի հեռացում։  Մենք բոլորս մի հարցում համամիտ ենք, այդ իշխանությունն ազգակործան պատուհաս է, և պետք է հեռանա»,-ասաց Զոհրաբյանը։

Զոհրաբյանը լավ է ճանաչում իր նախկին գործընկեր Նիկոլ Փաշինյանին։ Ապրիլի 13-ի ելույթն էլ այս համատեքստում է մեկնաբանում. «Ուզում էր ասել՝ Շուշին հանձնվել է»։ Սպասում էր, որ դատախազության ու ԱԱԾ աշխատակիցները պետք է մտնեին ԱԺ դահլիճ ու կալանվորեին Փաշինյանին, մինչդեռ նման բան չեղավ։

«Ասում է՝ ծնողներ, ես տարել եմ, մորթել եմ ձեր որդիներին։ Չեղավ արձագանք, այն, ինչ պետք է լիներ։ Ասում է՝ Արցախի կարգավիճակի նշաձողը պետք է իջեցնենք, այն, ինչ իրենից երկու օր առաջ ասեց Ալիևը։ Ինձ մոտ տպավորություն է՝ Նիկոլն ասում է, լավ ես է՞լ ինչ պետք է անեմ, որ համախմբվեք ու ինձ հեռացնեք։ Ինձ մոտ տպավորություն էր, որ այդ մարդը ներքին աղերս ուներ, ասում էր՝ ինձ հետ չեն բանակցում, միջազգային հանրությունն ինձ լուրջ չի ընդունում, Թուրքիայի ու Ադրբեջանի համար ես այլևս Ջոնի Բրջոնի եմ, էդ մարդն էլ ի՞նչ ասի, սիրելի հայրենակիցներ»,-ասաց Զոհրաբյանը։