Ձեր վստահելի աղբյուրը

Զոհված զինծառայողների մի խումբ ծնողներ Եռաբլուրից գնացել են Ազատության հրապարակ՝ հայտարարելով, որ  իրենց աջակցությունն են հայտնում 44-օրյա պատերազմի մասնակից Նվեր Կիրակոսյանին և Արթուր Ավագյանին, ովքեր ապրիլի 18-ից հացադուլ են հայտարարել։ Երիտասարդների նպատակն է անկախության  սերնդի ներկայացուցիչների ուշադրության սևեռումն Արցախի շուրջ ստեղծված իրավիճակին և կոնկրետ՝ գործնական քայլերի կատարման ուղղորդումը։

«Հասկանում ենք, որ հայ ազգը գնալով ամեն ինչ կորցնում է։ Կարելի է ախորժակը, աշխատանքը կորցնել, բայց ոչ հայրենիքը։ Նիկոլը՝ իր ընտանիքով ու իր կամանդը, իրեն աջակցողները, պետք է պատժվեն, թե չէ տեռոր է լինելու»,- հայտարարել է ծնողներից մեկ։

Նրանք հարցադրում են անում՝ ո՞ւր են հայոց բանակի գեներալները։

«Արցախի համար մենք՝ ծնողներս ենք ամենաթանկը վճարել»,- նշեց զոհված զինծառայողի ծնողը։ 

«12 օր է իմ որդին ծառայել, բայց առաջին օրվանից եղել են առաջնագծում, կռվել են, արյուն են թափել, բայց որ մի գեներալին հարցնես, կասի՝ իրավունք չունեին այդ երեխաներին հանեին առաջնագիծ, բայց հանել են»,- նշեց մեկ այլ ծնող։

Ծնողները նաև պահանջում են՝ Նիկոլ Փաշինյանն այլևս չգնա Եռաբլուր, «իրենց ներկայությունը մեզ ավելի է նյարդայնացնում»։

«Իրենց ՔՊ-ականներով թող չմտնեն Եռաբլուր, գալիս են, հիանո՞ւմ են իրենց արածով, ես չեմ հասկանում։ Թող չգան»,- նշեցին ծնողները։