Ձեր վստահելի աղբյուրը

Արցախի ԱԺ «Արդարություն» խմբակցության պատգամավոր Դավիթ Գալստյանը միացել է Ազատության հրապարակում ՀՀ ԱԺ «Պատիվ ունեմ» խմբակցության ղեկավար Արթուր Վանեցյանի կազմակերպած բողոքի ակցիային: «Հայելի» մամուլի ակումբը հենց Ազատության հրապարակում կազմակերպեց ասուլիս Արցախից ժամանած պատգամավորի հետ: 

Հարց-Ինչպե՞ս Արցախն արձագանքեց Նիկոլ Փաշինյանի վերջին հայտարարություններին:

Դ. Գալստյան-Արցախցիների ձայնը հնչեցրեց խորհրդարանը՝ հայտարարությամբ: Երեկ նաև մամուլում  տեսանք արցախյան մի շարք հասարակական կազմակերպությունների, արտախորհրդարանական ուժերի, քաղհասարակության ներկայացուցիչնեիի միանալն այդ հայտարարությանը: Այն նշանակում է, որ ամբողջ Արցախը չի ընդունում Նիկոլ Փաշինյանի այն հայտարարությունը, թե իբր միջազգային հանրությունը պահանջում է իջեցնել կարգավիճակի նշաձողը: Մենք այն համարում ենք օրակարգ բերված կեղծ հարց, որը պետք է հանվի այնտեղից: Առ այսօր ՀՀ իշխանությունները չեն փորձել փարատել մեր մտավախությունները, որը շատ մտահոգիչ է: Իսկ ընդհանուր առմամբ Արցախի բնակչության մոտ կա մտահոգություն ու մտավախություն: Մտավախությունն այն չէ, թե ինչ կանի թշնամին այլ մտավախությունն այն է, թե ինչ կանեն Հայաստանի իշխանությունները:

Հարց-Ալիևը երեկ հայտարարել է, որ բրյուսելը հաջող հովանավոր է Հայաստանի և Ադրբեջանի միջև խաղաղության հռչակագրի ստորագրման հարցում: Սա նշանակում է, որ Հայաստանն ամբողջությամբ ձեռքերը կլվանա Արցախի Հանրապետությունից՝ ճանաչելով Ադրբեջանի տարածքային ամբողջականությունը:

Դ. Գալստյան.-Բրյուսելի հանդիպումը և դրան հաջորդած Նիկոլ Փաշինյանի հայտարարությունը միանշանակ կասկածների տեղիք են տալիս, որ Հայաստանի իշխանությունը փորձում է ինչ-որ ձև խաղաղության դարաշրջան բացել տարածաշրջանում, որը կործանարար կլինի հայ ազգի համար: Այդ պատճառով է այսօր Ազատության հրապարակում այս ամենը կատարվում: Ինձ թվում է, որ հայ ազգը ոտքի է կանգնելու և նման կեղծ օրակարգով խաղաղության պայմանագիր չի լինելու: Տեսնելով մարդկանց այս բողոքների ակցիաները, տարբեր հայտարարությունները՝ համոզվում եմ, որ հայ ազգն արդեն հասկանում է, որ փորձում են այս ամենի քողի տակ իրենց իշխանության կյանքը երկարաձգեն, բայց մի օր գալու է և հասկանալու են, որ հայրենքն ավելի թանկ է, քան իրենց աթոռները:

Հարց-Ի՞նչ տպավորություն և ակնկալիքներ ունեք սկսված բողոքի շարժումից:

Դ. Գալստյան-Տպավորությունն այն է, որ ժողովուրդը սկսել է հասկանալ, որ այս գործընթացը, որը սկսել է ՀՀ իշխանությունը, կործանարար է ազգի համար: Այսօր տեսնում ենք ժողովրդի ավելի հոծ մասսաների միացումն բողոքի այս ակցիաներին, ինչը ստիպելու է հետ կանգնել նման կործանարար որոշում կայացնելուց և, ի վերջո, ժողովուրդը հասնելու է իր նպատակին:

Հարց-Արցախն ի՞նչ անելիք ունի, անհրաժեշտություն կա՞ այնտեղից նոր ուժերի ներգրավում այս ցույցերին, թե Հայաստանում իրականացվող գործողությունները բավարար են խնդրի լուծմանը հասնելու համար:

Դ. Գալստյան-Սա Արցախի, Հայաստանի պայքարը չէ՝ սա հայ ժողովրդի պայքարն է: «Հայեր միացեք» կոչը ոչ միայն Արցախում և Հայաստանում բնակվող հայերին է ուղղված, այլ՝ ամբողջ հայությանը և ամբողջ հայությամբ պետք է ոտքի կանգնենք, որ կարողանանք այս կործանարար գործընթացը կանգնեցնել: Ոչ միայն Արցախից, այլև ողջ հայությունից է ակնկալվում ներգրավում այս գործընթացին, հակառակ դեպքում կկորցնենք, թե Արցախը, թե Հայաստանը, թե Հայի արժանապատվությունը:

Հարց-Փաշինյանը և իր համակիրներն ասում են, որ չեն գալիս Արցախ որպեսզի չսադրեն Ադրբեջանին: Ինչպե՞ս կգնահատեք այս հիմնավորումը:

Դ. Գալստյան-Դա կեղծ օրակարգ է, թե իբր չեն գալիս Արցախ, որ չսադրեն: Մենք տեսնում ենք Ադրբեջանի կողմից պարբերաբար կատարվող սադրանքները և այն կապ չունի, թե Հայաստանից որևէ պաշտոնյա եկել է, թե ոչ: Այն կամ զուտ իրենց ցանկությունն է ձեռքերը լվանալ Արցախից, կամ իրենց պարտադրում են, որի մասին չեն կարողանում բարձրաձայնել: Բայց անընդունելի է այն իշխանությունը, որը թշնամու պարտադրանքով է շարժվում: Արցախցին սպասում է յուրաքանչյուր հայի, որը կգա Արցախ և դրանով նրա մոտ հույս կարթնացնի, համոզմունք կսերմանի, որ Հայաստանը ձեռքերը չի լվացել: Այս դեպքում, ցավոք սրտի, հակառակ երևույթին ենք ականատես լինում: Կոչ եմ անում համախմբվե՛նք՝ փրկե՛նք Արցախը, Հայաստանը և հայ ազգի արժանապատվությունը: