Ձեր վստահելի աղբյուրը

44-օրյա պատերազմի մասնակից Նվեր Կիրակոսյանը, ով իր ընկերոջ՝ Արթուր Ավագյանի հետ Ազատության հրապարակում արդեն երեք օր հացադուլ է հայտարարել, երիտասարդներին կոչ արեց  իրենց միանալ ոչ հացադուլով, այլ՝ այլ ֆորմատով։

«Գալիս են շատ երիտասարդներ, ովքեր ցանկություն են հայտնում միանալ հացադուլին։ Մենք ամեն կերպ հորդորում ենք, խնդրում ենք, բացատրում, որ զերծ մնան այդ քայլից։ Բազմիցս նշել ենք,  ևս մեկ անգամ նշեմ, որ մեր գործողությունը, այս պահին մեր ռեակցիան ինքն իր խնդիրը լուծում է՝ ազդանշան է, որը տալիս ենք երկուսս։ Եթե մարդիկ մեզ միանան հացադուլի ֆորմատով, ինքնանպատակ քայլ է, ու կարողացել ենք բացատրել նրանք, ովքեր ցանկացել են միանալ հացադուլին։  Ուստի խնդրում ենք և հորդորում ենք մարդկանց, որպեսզի այլ ֆորմատով միանան մեզ՝ կլինի նստացույց, կլինի ուղղակի մեր հանրային քննարկումներին միանալը, գալ, լսել մեզ, կարծիքներ փոխանակել», - ֆեյսբուքյան ուղիղ եթերի ժամանակ ասաց Նվեր Կիրակոսյանը։

Նա նշեց, որ իրենց հացադուլը ապակուսակցական է, վերանձնային տիրույթում է. «Մենք Արցախի շուրջ ստեղծված մտահոգության մարմնավորումն ենք»։

Նվեր Կիրակոսյանն ասաց, որ իրենք Ազատության հրապարակում են, քանի որ անհրաժեշտություն են տեսել՝ եկել է պահը, որ գաղափարի, բացարձակ արժեքների շուրջ պետք է կանգնել անձերից վեր. «Մենք հասկանում ենք, որ փորձեր են կատարվում մեզ ասոցացնել անձերի, ուժերի հետ, դրանք կեղծ են, այստեղ ոչ թե անձերի ասոցացիա է, այլ գաղափարի շուրջ նույնականացում է։ Եկել է պահը, որպեսզի մենք գաղափարական, քաղաքացական, քաղաքացիական  հասունությանը գանք, որ եթե հարցն արդեն առչնվում է կենսական շահերին, բացարձակ արժեքներին, ապա այդտեղ պետք է վեր կանգնել անձերից։ Անձերը  պատմական կտրվածքով, իրոք, փոքր ֆիգուրներ են, որովհետև իրականն ազգն ու ազգի հոգեբանությունն է»։

Նա նշեց, որ իրենց ակցիայի թիրախն անկախության սերունդն է` այն մարդիկ, ովքեր ծնվել են 1990-ականներին ու դրանից հետո, սակայն իրենք դիմում են ոչ միայն անկախության սերունդին, այլև՝ անկախության մարդկանց, ովքեր ծնվել են 1990-ականներից առաջ, բայց անկախությունը և իրենց առաջ քաշած  գաղափարները, կարևոր են այդ մարդկանց համար։

Նվեր Կիրակոսյանը հայտարարեց, թե պահն է եկել, որ ամեն մեկը դուրս գա իր կոմֆորտ զոնայից, գա Ազատության հրապարակ ու միանա, հասկանա՝  ինչ է պետք անել։

«Մենք ասում ենք՝ կա մտահոգություն, հասել ենք արժանապատվության կարմիր գծին, իրավիճակը ծայրահեղ է, հացադուլի նպատակը այս սիգնալը տեղ հասցնելն է», - ասաց Նվերը։

44-օրյա պատերազմի մասնակից Ն.Կիրակոսյանը խնդրելով պահանջեց, որ այսօր ժամը 19։30-ին, մարդիկ գան Ազատության հրապարակ, քննարկեն, հասկանան՝ ինչ ունեն անելու։

«Եթե դուք գալիս եք, այնքան շատանում է հավանականությունը, որ մեք շուտ դուրս կգանք հացադուլից։ Ամեն օր, քանի դեռ չի հավաքվել այդ կրիտիկական զանգվածը, մենք  ժամը 19։30-ին հրավիրելու ենք։

Մեզ պետք չի խղճալ, մենք մեզ շատ լավ, գերազանց ենք զգում, ամենակարևորը՝ սթափ ենք։ Մենք հաշտ ենք ցանկացած անձի հետ, ով կիսում է մեր մտահոգությունն ու ասում է՝ մենք որպես անկախության սերունդ չենք պատկերացնում Արցախն Ադրբեջանի կազմում», - ասաց Նվեր Կիրակոսյանը։