Իշխանություններն ասում են՝ տեխնիկական պատճառներով կարող ենք խախտել Սահմանադրությունը. Արմեն Ռուստամյան
«Ինչ անում են այսօրվա իշխանությունները, ավելի ու ավելի է նմանվում նրան, որ սկսում են ինքնաբացահայտվել, ինքնախոստովանական հայտարարություններով հստակեցնել, թե եկել են իշխանության, որ ի՞նչ անեն»,-Ազատության հրապարակում կազմակերպված «Հայաստան-Թուրքիա հարաբերությունների հայեցակարգային դրույթներ» թեմայով բաց քննարկման ժամանակ ասաց ԱԺ «Հայաստան» խմբակցության պատգամավոր Արմեն Ռուստամյանը՝ անդրադառնալով այն փաստին, որ ԱԺ ղեկավարությունն այսօր արգելել էր ԱԺ-ում կազմակերպել հայ-թուրքական հարաբերություններին նվիրված լսումները և հայտարարության ընդունումը:
Նրա խոսքով՝ ընդդիմության նախաձեռնած ԱԺ-ի քննարկումն արգելափակելով՝ ԱԺ ղեկավարությունն էլ ինքնախոստովանական քայլով ինքնաբացահատվեց:
«Բացահայտվել է առնվազան երկու կարևոր բան՝ այն պատճառաբանությունը, որ բերում են, թե տեխնիկական պատճառներով չեն կարողանում կազմակերպել «Հայաստան-Թուրքիա հարաբերությունների հայեցակարգային դրույթներ»-ին վերաբերղ ԱԺ լսումներն, իրականում ծիծաղելի է: Գիտենք, որ լսումների կազմակերպումը պարտավորություն է, որը պետք է իրականացվի և այն, ինչ իրենք անում են, Սահմանադրության և օրենքների կոպիտ խախտում է: Այսինքն ասում են, որ տեխնիկական պատճառներով կարող ենք խախտել Սահմանադրությունը և օրենքները, որն ինքնին աբսուրդ է»,-հայտարարեց Ռուստամյանը:
Պատգամավորի խոսքով՝ իշխանությունների նման գործելաոճը հերքում է նրանց ամպագորգոռ արտահայտությունները, թե իրենք ավելի արդյունավետ կառավարում են բերել երկիր, ԱԺ-ն ավելի բաց, թափանցիկ է գործում, այն դարձել է հանրության տեսակետներն արտահայտելու վայր:
Արմեն Ռուստամյանը հայտնեց, որ այսօր ԱԺ-ն չի կարողանում միաժամանակ երկու միջոցառում կազմակերպել,ինչպես իրենք են հիմնավորել, քանի որ այս օրերին նաև հայ-ռուսական աշխատանքային խմբերն են հանդիպում:
«Փաստորեն այսօրվա իշխանությունների օրոք հնարավոր չէ երկու միջոցառում միաժամանակ կազմակերպել, երբ նախկինների ժամանակ ԱԺ-ն միաժամանակ մի քանի միջոցառում էր կարողանում կազմակերպել: Սա ցույց է տալիս, թե ինչ մակարդակի ղեկավարում ունենք ընդհանրապես բոլոր տեղերում, իսկ ԱԺ-ն փաստորեն փաստում է իր անկարողությունը»,-ասաց ընդդիմադիր պատգամավորը և հավելեց. « Մենք ԱԺ-ում ընդունելու համար նախատեսած այդ հայտարարությամբ գծում էինք այն կարմիր գծերը, որից հետո սկսվում է մեր ազգային, պետական խնդիրների ձախողումը, ազգային ինքնության կորուստը, որ ուղղակի գնալու ենք հայոց պետականության փլուզման ճանապարհով, որովհետև մեր հարևան երկրները՝ Թուրքիան և Ադրբեջանն անթաքույց հակահայկական ծրագրեր են իրականացնում, պահանջներ են դրել մեր առջև և դրան ադեկվատ չարձագանքելը, կարմիր գծերը չգծելը, ըստ որի դրանից հետո Հայաաստանը չի պատրաստվում որևէ զիջում իրականացնել, սա ուղղակի նշանակում է սպասարկել թուրք-ադրբեջանական տանդեմի շահերը: Այս արգելափակումով իշխանություններն ուղղակի ընդգծեցին, որ սպասարկում են այլ շահեր»:
Լրահոս
Տեսանյութեր
Հայաստանի ու հայ ժողովրդի շահերը պաշտպանող իշխանություն գոյություն չունի. Բագրատ Սրբազան
