Ձեր վստահելի աղբյուրը

Ռուսաստանի նախագահ Վլադիմիր Պուտինը հինգշաբթի օրը ՌԴ պաշտպանության նախարար Սերգեյ Շոյգուի հետ հանդիպման ժամանակ Մարիուպոլի «Ազովստալ» արդյունաբերական գոտու վրա հարձակումը ոչ նպատակահարմար է անվանել և հրամայել է չեղարկել այն։ Լուրը հաղորդում է ՏԱՍՍ-ը:

«Արդյունաբերական գոտու վրա առաջարկվող հարձակումը ոչ նպատակահարմար եմ համարում։ Հրամայում եմ չեղարկել այն»,- ասել է ՌԴ գերագույն հրամանատարը, ինչին պաշտպանության նախարարն արաձագանքել է՝ «լսում եմ»։

Պուտինն իր այդ հրամանը բացատրել է ռուս զինվորականների կյանքերը խնայելու նկատառումներով։ «Սա այն դեպքն է, երբ մենք պետք է մտածենք, այսինքն՝ միշտ էլ պետք է մտածենք, բայց այս դեպքում՝ առավել ևս, փրկելու մեր զինվորների ու սպաների կյանքն ու առողջությունը։ Կարիք չկա բարձրանալ այս արդյունաբերական օբյեկտների կատակոմբների վրա և այնտեղից սողալ գետնի տակ»,- ընդգծել է նախագահը։

«Արգելափակեք այդ արդյունաբերական տարածքը, որպեսզի այնտեղից ճանճը չկարողանա դուրս գալ»,-հրամայել է նա։

Պուտինը նաև հանձնարարել է Շոյգուին ևս մեկ անգամ հանձնվելու կոչ անել բոլորին, որոնք դեռ վայր չեն դրել զենքերը։

«Ռուսական կողմը երաշխավորում է նրանց կյանքը և արժանապատիվ բուժումը՝ համապատասխան միջազգային իրավական նորմերին համաձայն: Յուրաքանչյուր տուժածին կտրամադրվի որակյալ բժշկական օգնություն»,- ասել է նախագահը։

Շոյգուն Պուտինին զեկուցել է, որ ամբողջ Մարիուպոլը գտնվում է վերահսկողության տակ, զինյալները ապահով արգելափակված են «Ազովստալ» գործարանի տարածքում։