Ձեր վստահելի աղբյուրը

«ՀՀ կառավարության 2007թ. որոշմամբ սահմանված են ՀՀ քաղաքացիություն ստանալու, ինչպես նաև այն դադարեցնելու համար անհրաժեշտ փաստաթղթերը ներկայացնելու, դիմումների քննարկման կարգը և եկեղեցական այն կառույցների ցանկը, որոնց կողմից տրված մկրտության մասին փաստաթուղթը համարվում է ազգությամբ հայ լինելը հաստատող փաստաթուղթ»,-ԱԺ պետական-իրավական հարցերի մշտական հանձնաժողովում այսօր հայտնեց  ոստիկանության պետի տեղակալ Արա Ֆիդանյանը՝ ներկայացնելով «ՀՀ քաղաքացիության մասին» օրենքում փոփոխություններ և լրացումներ կատարելու մասին հարցը:

Նրա խոսքով՝ դեռևս, օրենքով ՀՀ կառավարությանը տրված չէ այդ կարգերից օգտվելու հնարավորություն և նախագծով գործադիրին օրենքով հնարավորություն կտրվի օգտվել մոտ 13 տարի առաջ ընդունված որոշումներից:

«Կարծում եմ ճիշտ չէ, երբ մենք ասում ենք պարզեցված կամ արագացված կարգով ազգությամբ հային քաղաքացիություն շնորհելու մասին»,-իր ելույթում նկատեց ՔՊ պատգամավոր Վիգեն Խաչատրյանը և առաջարկեց «ազգությամբ հայեր» ձևակերպումը հանել, քանի որ  հնարավոր է լինի դեպք, երբ դիմողն ազգությամբ հայ չլինի, բայց ՀՀ-ն ընդառաջի նրան ՀՀ քաղաքացիություն տալու հարցում:

«Ես ոչ թե դեմ եմ ազգությամբ հայի ընդգծմանը, այլ կարծում եմ, որ այն վիրավորական է, որ ասում ես՝ արի ապացուցի, որ հայ ես»,-պարզաբանեց Խաչատրյանը:

ՔՊ մյուս պատգամավորը՝ Արմեն Խաչատրյանն էլ համաձայնեց Վիգեն Խաչատրյանի հետ՝ ասելով, որ պարզեցված քաղաքացիություն ստանալու հնարավորություն պետք է տրվի ոչ միայն հայերին, քանի որ կան շատ մարդիկ, որոնք ցանկանում են ներդրումներ անել Հայաստանում և նման ձևով նրանց կարելի է մոտիվացնել:

Նա առաջարկեց ներդրում անողների համար ձևավորել պարզեցված քաղաքացիություն տալու համակարգ:

Հանձնաժողովի նախագահ Վլադիմիր Վարդանյանը հայտնեց, որ նման համակարգ գործում է Եվրոպայում, բայց այն երկրներում, որոնց քաղաքացի դառնալը մեծ պահանջարկ ունի:

«Առանց հիմնավոր որոշակի փաստաթղթերի առկայության ՀՀ քաղաքացիության շնորհումը մենք անչափ վտանգավոր ենք դիտարկում»,-պատգամավորների առաջարկներին արձագանքեց փոխոստիկանապետ Արա Ֆիդանյանը:

Հանձնաժողովի նիստին ներկա ՔՊ պատգամավորները միաձայն ընդգրկեցին նախագիծը ԱԺ օրակարգ և սահմանեցին քննարկման 24-ժամյա ռեժիմ: