Ձեր վստահելի աղբյուրը

«Շփման ցանկացած ձևաչափ կարևոր է, հատկապես տարածաշրջանի երկրների համար, բայց պետք է ամենակարևորը հասկանալ, թե այս ձևաչափում ինչ հարցեր են քննարկվում, արդյոք կքննարկվեն այնպիսի հարցեր, որոնք մինչ այս քննարկվել են այլ ձևաչափերում», - Ազատության հրապարակում  լրագրողների հետ զրույցում ասաց ԱԺ «Պատիվ ունեմ» խմբակցության ղեկավար, «Հայրենիք» կուսակցության նախագահ Արթուր Վանեցյանը՝ պատասխանելով հարցին, թե ինչպե՞ս է գնահատում «3+3» ձևաչափը, արդյո՞ք այն կենսունակ է, կարո՞ղ է հաջողության հասնել։

Ըստ նրա, խոսքն արցախյան հիմնախնդրի մասին է, որ այն չի կարող դուրս գալ ԵԱՀԿ Մինսկի խմբի համանախագահության ձևաչափից և գնալ քննարկվելու այլ ձևաչափերում։

«Իսկ, առհասարակ, շփումները ողջունում եմ և համարում եմ նորմալ», - ասաց Ա. Վանեցյանը։

Հարցին, թե ինչպե՞ս է գնահատում Իրանի պահվածքը ստեղծված իրավիճակում, ընդդիմադիր քաղաքական գործիչն ասաց. «Իրանը բազմիցս հայտարարել է իր կարմիր գծերը, Իրանը հստակ ասել է, թե ինչ չի հանդուրժի իր սահմաններին։ Կարծում եմ՝ Իրանը շատ ճիշտ է իրեն պահում տարածաշրջանում երկարաժամկետ խաղաղություն ունենալու համար»։

Նա նշեց, որ Իրանն իր քայլերով ցույց է տվել, որ իր համար կարևոր է տարածաշրջանում խաղաղությունը, մատնանշել է իր կարմիր գծերը թե Թուրքիայի, թե Ադրբեջանի համար։

«Կարծում եմ՝ Իրանի պահվածքը շատ բարեկամական է Հայաստանի նկատմամբ»,- ասաց Արթուր Վանեցյանը։