Ձեր վստահելի աղբյուրը

«Որպես անկախության սերնդի ներկայացուցիչ, մտահոգ քաղաքացի Արցախի պետականության և մեր հայրենակիցների՝ Արցախում ապրելու իրավունքի հարցերով, գտնվում եմ այստեղ, սատարում եմ հացադուլ անող  ընկերներիս, բոլոր մեր գաղափարակիցներին, ովքեր  միանում են բացարձակ արժեքները կրելուն»,- Ազատության հրապարակում լրագրողներին ասաց 44-օրյա պատերազմի մասնակից Մնացական Ավետիսյանը։

Նա իր աջակցությունն է հայտնում արդեն 4-րդ օրն Ազատության հրապարակում հացադուլ հայտարարած պատերազմի մասնակիցներ Նվեր Կիրակոսյանին և Արթուր Ավագյանին։

Մնացականը կոչ է անում անկախության սերնդի ներկայացուցիչներին այսօր ժամը 19։30-ին գալ Ազատության հրապարակ՝  գեներացնելու մեր մտքերը,  գաղափարները կախված Արցախը որպես բացարձակ արժեք  ընկալելու, կրելու, պահպանելու, հարկ եղած դեպքում պաշտպանելու համար։

Մնացական Ավետիսյանն ասաց, որ պատերազմի ժամանակ պահում էին  ռազմաճակատի խրամատը, այստեղ պահում են այն գաղափարը, որի համար կռվել են։

«Մեր օրակարգն է ֆիքսել, որ Արցախի պետականությունը, մեր հայրենակիցների՝ Արցախի իրենց պատմական հողերում ապրելու և արարելու  իրավունքը բացարձակ արժեք է։ Մենք այս պրոցեսով  ցանկանում ենք հասկանալ՝ կհավաքվի՞ արդյոք այդ կրիտիկական զանգվածը, կրո՞ւմ են մարդիկ այդ արժեքները մեր հետ, կիսո՞ւմ են այդ գաղափարները, թե՞ ոչ։ Արդեն ձևավորված ուժի շրջանակներում՝ հետագա պրոցեսների հետ կապված կտեղեկացնենք հավելյալ»,- ասաց Մնացականը։

44-օրյա պատերազմի մասնակից Մնացականի կարծիքով, իրենց որդեգրած քայլերը հնարավոր է  տանեն Արցախի  անվտանգության ապահովմանը։

«Ամեն դեպքում պայքարում ենք այդ նպատակի համար։  Վերջնարդյունքը պարզ կլինի»,- ասաց նա։

Մնացական Ավետիսյանը ևս մեկ անգամ հրապարակային կոչ արեց իր ընկերներին դադարեցնել հացադուլը. «Քանի որ այսօր ինչքան կարևոր է այդ գաղափարները, այնքան ինձ համար որպես ընկեր, կարևոր է Արթուրի և Նվերի առողջության կայունությունը։

Հուսով եմ՝ այսօր ականատես կլինենք լայն շերտերի արձագանքին և այն խնդիրը, որ ի սկզբանե դրել էին Արթուրն ու Նվերը,  հասունանում է և աճի գրանցման փուլում է»։