Ձեր վստահելի աղբյուրը

«Արձագանքը շատ լավ եմ գնահատում։ Առաջին փուլի համար ինչ նպատակ դրել էինք մեր առաջ, կատարել ենք 100 տոկոս և մի բան էլ ավելի։ Դեռևս ամեն օր շարունակվելու է այս պայքարը»,- Ազատության հրապարակում լրագրողներին ասաց «Հայրենիք» կուսակցության նախագահ, ԱԺ «Պատիվ ունեմ» խմբակցության ղեկավար Արթուր Վանեցյանը։

Հիշեցնենք, որ Արթուր Վանեցյանն ապրիլի 17-ին Ազատության հրապարակում հայտարարեց անժամկետ բողոքի ակցիաների մեկնարկի մասին՝ գիշերելով հրապարակում։

Նրա խոսքով, հրապարակ են գալիս մարդիկ, որոնք նախկինում երբեք որևէ հանրահավաք, բողոքի ակցիա չեն մասնակցել։

«Մարդիկ գալիս են հասկանալով, որ սա պայքար է հանուն հայրենիքի, հանուն Հայաստանի ու Արցախի, հանուն հայ ժողովրդի։ Իսկ ինչ վերաբերում է մնացած ընդդիմադիր ուժերի կողմից պայքարը սկսելուն, հավատացեք, ամբողջ ճանապարհային քարտեզը կա,  մեզ հայտնի է, գիտենք, մեր ընդդիմադիր  գործընկերների հետ մշտապես քննարկման մեջ ենք, առաջիկա  օրերին ականատես կլինեք ավելի լայնածավալ բողոքի  ակցիաների ավելի կոնկրետ գործողություններով»,- ասաց ընդդիմադիր գործիչը։

Նա նշեց, որ իրենք ապակենտրոն, ցանցային պայքար են իրականացնում, ընդդիմադիր գործիչները բոլորը լինելու են այդ պայքարի մեջ։

Արթուր Վանեցյանն ասաց, որ իշխանությունների՝ սոցիալական ցանցերում գործող ֆեյք դանակներն են ակտիվացել, չափ ու սահման չկա. «Կեղծ լուրեր են տարածում, հետո սկսում են իրենց մամուլով տարածել։ Լրատվական դաշտում իրենց շատ վատ են պահում  ու փորձում են մոլորեցնել մեր հանրությանը»։

Հարցին՝ այս օրերին իշխանամերձ  հատվածներից սոցցանցերում մեկնաբանություններ  են թողնում, ձեր նկատմամբ պատժի ձևեր են մտածում, օրինակ՝ կոչումներից զրկել և այլն, ինչպե՞ս եք վերաբերում այդ սպառնալիքներին ու քննադատություններին, գեներալ-մայոր Արթուր Վանեցյանն ասաց. «Գլուխները  պատով կտան, ինձ կոչումներից կզրկեն։ Այդ կոչումներն իրենց հոր տնից չեն բերել։  Այդ կոչումներին ես արժանացել եմ իմ երկարատև ծառայության համար։

Եթե իմ նկատմամբ հնարավոր լիներ օրինական ճանապարհով  որևէ քրեական գործ հարուցել, դատապարտել, կալանքի ենթարկել, հավատացեք՝ իրենք արդեն վաղուց արած կլինեին։ Իմ հրաժարականից հետո, եթե չեմ սխալվում, 5-ից ավելի գործերով  մեղադրյալ եմ եղել ամենածանր հոդվածներից սկսած, ամբողջությամբ հերքվել են, կարճվել են։

Ականատես եղաք տեղեկատվական տեռորի, որ սկսվել էր իմ նկատմամբ, անգամ Փաշինյանի  մամուլի խոսնակի մակարդակով  տարածվող կեղծ տեղեկությունները  արդեն դատարանների կողմից ամբողջությամբ հերքվել են, պարտավորեցրել են հերյուրանքներ տարածողներին  հերքել այդ տեղեկատվությունները։  Այսինքն ես չեմ արել որևէ բան, որն օրենքից դուրս է, չեմ արել որևէ բան, որի համար ինձ կարող են քրեական պատասխանատվության  ենթարկել։ Նրանց գործիքը դա է՝ կեղծ տեղեկատվություններ, վարկաբեկման փորձ, որը ժամանակի հարց է, կարճ ժամանակ հետո հանրությունն իմանում է՝ ով է ճիշտ, ով սխալ»։