Ձեր վստահելի աղբյուրը

«Երբեք դեմ չենք եղել Թուրքիայի հետ հարաբերություններ հաստատելուն։ Հիմա այդ կեղծ հակաքարոզչությունը, թե իբրև մենք դեմ ենք հարաբերությունների հաստատմանը, ուղղակի չի համապատասխանում իրականությանը»,- Ազատության հրապարակում «Հայաստան-Թուրքիա հարաբերությունների հայեցակարգային դրույթներ» թեմայով քննարկմանն ասաց ԵՊՀ արևելագիտության ֆակուլտետի դեկան, պատմագիտության դոկտոր, պրոֆեսոր Ռուբեն Մելքոնյանը։

Նա նշեց, որ ուղղակի  Հայաստանը երբեք կողմ չի եղել թուրքական խաղի կոնոններով և թուրքական նախապայմաններով հարաբերություններ կարգավորելուն, որոնք ուղիղ առնչվում են մեր ազգային ու պետական ինքնությանը, զիջումներ են մեզ համար համազգային կարմիր  գծերից ու համապետական կարմիր գծերից, այդ պայմաններով  երբեք համաձայն չի եղել հարաբերությունների հաստատմանը։ 

«Բայց բանալին, ինչպես ասում են, այստեղ է, որ Թուրքիան էլ երբեք համաձայն չի եղել  այլ ոճով Հայաստանի հետ հարաբերություններ հաստատել և հիմա էլ այդ նրա համազումն ու մոտեցումը բացարձակապես չի փոխվել»,- նշեց թուրքագետը։

Նա ասաց, որ Հայաստանի և Թուրքիայի միջև հարաբերությունների հաստատման տարբեր փուլեր են եղել, 30  տարվա ընթացքում Հայաստանի և Թուրքիայի միջև հարաբերություններ հաստատելու տարբեր փորձեր են եղել։

«Բայց հիմա հռետորական հարց տամ և ինքս էլ պատասխանեմ՝ արդյո՞ք այս ժամանակաշրջանը՝  պատերազմից հետո դիվանագիտական ամենավատ  ստարտային պայմաններով, իշխանական ամենաթույլ թիմով, այսինքն ոչ  պրոֆեսիոնալ մասնագետներով, միջազգային ոչ բարենպաստ իրավիճակում Հայաստանի և Թուրքիայի միջև հարաբերությունների հաստատումը ձեռնտու է  հայկական պետականությանը։ Իհարկե, ոչ։ Հետևաբար, մենք ոչ թե այս պրոցեսը նախաձեռնել ենք Հայաստանում, այլ այս պրոցեսին մեզ տարել են, տանում են, քանի որ  մեր դիմադրողականության վերջին նշույլները 2021  թվականի հունիսի 20-ին ոչնչացվել են գիտակցաբար։ Հետևաբար, հիմա Հայաստանի պատմության ընթացքում ամենավատ, ամենաոչբարենպաստ ժամանակահատվածն է դիվանագիտական, քաղաքական և այլ առումներով»,- ասաց Ռ. Մելքոնյանը։

Նա նաև ընդգծեց, որ թեև խոսվում է թուրքական նախապայմանների բացակայության մասին, բայց Թուրքիայի կողմից Հայաստանին ներկայացված նախապայմանները շարունակում են մնալ օրակարգում ամենախիստ ոճով ու դրանք ավելանում են, կա ավելացման միտում։ Մասնագետը թվարկեց երեք հիմնական նախապայմանները՝ Արցախի  հարցի ադրբեջանանպաստ լուծում, Ցեղասպանության հարց և Թուրքիայի տարածքային  ամբողջականության ճանաչում կամ Կարիս պայմանագրի ճանաչում։

Ինչ վերաբերում է իշխանության հայտարարություններին, թե Թուրքիայից դրական մեսիջներ են ստանում, Ռ.Մելքոնյանն ասաց, որ որպես մասնագետ և  նաև թուրքագետների մեծամասնությունը  որևէ դրական մեսիջ չեն տեսնում։

«Թուրքիայի կողմից որևէ ջերմացում, դիրքերի  թուլացում չկա»,- ասաց թուրքագետը։

Նա ցավով անդրադարձավ նաև Հայաստանի ԱԺ ամբիոնից հնչող տարատեսակ, իր իսկ կողմից գնահատվող վտանգավոր թեզերին։

«Դրանք միտված են թուլացնելու Հայաստանի ժողովրդի զգոնությունը, ցույց տալու մի երևակայական լավ Թուրքիա, որը գոյություն չունի։  Մեր հասարակությունը գտնվում է  երկու հարձակման, երկու կրակահերթի ներքո՝  մեկը թշնամի պետությունից, մեկը իշխանությունից»,- ասաց պատմագիտության դոկտոր, պրոֆեսորը։

Նա ասաց, որ ինքն այս ուժի ներկայացուցիչների հետ  Հայաստանի շահերը քննարկելու որևէ պատրաստակամություն չունի, չի կարող Հայաստանի շահերը քննարկել մարդկանց հետ, որոնք  4 տարի ոտնահարել ու կործանել են մեր արժեքները, այսօր էլ ԱԺ-ից խոսում են լավ Թուրքիայի, հայկական ինքնությունից թուրքատյացությունը դուրս բերելու, Թուրքիայի հետ հարաբերությունների սպասվող ոսկե սարերի մասին, ոտանահարում են մեր կարմիր գծերը, որոնք կապված են մեր ազգի պետականության, պատմության  հիշողության հետ։