Ձեր վստահելի աղբյուրը

«Կարևոր է արձանագրել, որ 2021 թվականը մեկնարկեց լարված ֆինանսատնտեսական միջավայրով, ինչը պայմանավորված էր Արցախի պատերազմի հարուցած սոցիալական, հոգեբանական անվտանգային, քաղաքական որոշակի ճգնաժամերով, ինչպես նաև քովիդի համավարակով ի հայտ եկած սոցիալ-տնտեսական անորոշություններով»,-կառավարության նիստում հայտնեց ֆինանսների նախարարի տեղակալ Արմեն Հայրապետյանը՝ զեկուցելով ՀՀ 2021 թվականի պետական բյուջեի կատարման տարեկան հաշվետվությունը:

Նրա խոսքով՝ իրականացված հարկաբյուջետային դրամավարկային և տնտեսական քաղաքականությունների համադրման արդյունքում 2021 թվականին ՀՆԱ-ի աճը կազմել է 5,7 %:

Ֆինանսների փոխնախարարի խոսքով՝ հարկային եկամուտների և տուրքերի պլանը շուրջ 147 մլրդ դրամով գերակատարվել է, ինչի արդյունքում հարկեր-ՀՆԱ ցուցանիշը նախորդ տարվա նկատմամբ բարելավվեց 0,3 տոկոսային կետով, և 2021 թվականին արձանագրվել է 22,7% հարկեր-ՀՆԱ մակարդակը:

Ըստ Արմեն Հայրապետյանի՝ 2021 թվականի ընթացքում Կառավարության պարտքը նվազել է շուրջ 3,2 տոկոսային կետ՝ հասնելով ՀՆԱ-ի 60,3 %-ին:

Ֆինանսների փոխնախարարն ընդգծեց, որ 2021 թ. 216 մլրդ դրամի կապիտալ ծախսերը կատարվել են 100 %-ով: 

«Քովիդի համավարակի և Արցախյան պատերազմի հետևանքների էական մեղմանն ուղղված ծավալը կազմել է 54,6 մլրդ դրամ՝ ՀՆԱ-ի մեջ՝ 0,8 %»,-ասաց Արմեն Հայրապետյանը:

Կառավարությունը միաձայն հաստատեց բյուջեի հաշվետվությունը: