Ձեր վստահելի աղբյուրը

«Վերահաստատում ենք՝ այն, ինչ մենք անում ենք, ըստ էության, մեր անձերից վեր է, արժեքների հարց է, որևէ կերպ  ուղղորդված կամ պռոեկտավորված չէ, գործում ենք մեր խղճի թելադրանքով ու այդպես էլ գործելու ենք»,- ֆեյսբուքյան ուղիղ եթերում ասաց Նվեր Կիրակոսյանը, ով Արթուր Ավագյանի հետ արդեն 5-րդ օրը հացադուլ է անում Ազատության հրապարակում։ 

Նա նշեց, այսօր արդեն փաստացի կարող են արձանագրել, որ իրենք ձևակերպել են անկախության սերնդի պահանջը, այն է՝  Արցախյան շարժումը ժառանգություն է, որին պետք է տեր կանգնել, այս պետականությունը կառուցվել է դրա վրա, ուստի պետականության տեսանկյունից պետականության հանդեպ ունեցած պատկառանքից պետք է փայփայել, անկախության սերունդը կրում է այս արժեքներն ու ասում է կոնկրետ մի հաղորդագրություն՝ «Արցախն Ադրբեջանի կազմում չի կարող լինել, մենք դա չենք պատկերացնում»։

Նվերն ասաց, որ երեկվանից կազմակերպել են ստորագրահավաք, որը փաստում է՝ իրենց գաղափարները կիսում են ու դա ամրագրվում է ստորագրություն դնելով ու անուն-ազգանունը գրելով։

«Սա մեզ պետք է ունենալ արձանագրած, որպեսզի համարենք, որ մեր պայքարը հացադուլի մեթոդով հաջողել ենք այս փուլում։ Դրական ազդակները շատ են։ Մենք լիահույս ենք՝ շատ շուտով դա կարձանագրենք, որ հացադուլն արդեն որպես պայքարի մեթոդ դադարում է և իր նպատակին չի ծառայում,  պայքարի այլ մեթոդներ են պետք  դիվերսիֆիկացված»,- ասաց Նվեր Կիրակոսյանը։

Նա կոչ արեց երիտասարդությանն այսօր ժամը 19։30-ին  լինել Ազատության հրապարակում՝ լսել իրենց ասելիքները, որոնք շատ կարևոր են ու շատ վճռական։ 

Նվեր Կիրակոսյանի խոսքն ամբողջությամբ՝ տեսանյութում։