Ձեր վստահելի աղբյուրը

«Ես նստացույց չէի հայտարարել, հայտարարել էի շուրջօրյա իրազեկման ակցիաներ, որ լինելու եմ Ազատության հրապարակում, զրուցելու եմ մեր հայրենակիցների հետ։ Շուրջօրյա ակցիաները չեն ավարտվում, ուղղակի փոխում է իր տրամաբանությունը»,- լրագրողներին ասաց «Հայրենիք» կուսակցության նախագահ Արթուր Վանեցյանը, ով  ապրիլի 17-ին հայտարարել էր անժամկետ բողոքի ակցիաների մեկնարկի մասին՝ գիշերելով Ազատության հրապարակում։

Նա ասաց, որ ապրիլի 25-ից սկսվում է իրենց պայքարի երկրորդ՝ արդեն ակտիվ փուլը, կիրականացնեն տարբեր ակցիաներ։

Վանեցյանի խոսքով, ապակենտրոն պայքար է լինելու, բայց չի նշանակում, որ չեն սինխրոնիզացնելու ակցիաները. «Մի օր «Հայաստան» դաշինքի մեր գործընկերները կարող է ակցիա անեն, մի օր մենք, մի օր համատեղ, մարզերում կլինեն համատեղ միջոցառումներ։ Վստահ եմ, որ դա բացառապես «Հայաստան» և «Պատիվ ունեմ» դաշինքների մեջ ընդգրկված ուժերի պայքարը չէ, մենք եկել ենք այստեղ պայքարելու հանուն մեր երկրի ու հայ ժողովրդի։ Պայքարը լինելու է շարունակական, շատ ինտենսիվ ու տալու է պտուղները»։

Հարցին, մամուլում տարածվեցին լուրեր, որ եղել է Մոսկվայում ու այնտեղից վերադառնալուց հետո է որոշում կայացրել գալ  Ազատության հրապարակ, Ա. Վանեցյանն ասաց. «Ես եղել եմ Ռուսաստանում մասնավոր այցով, իմ անձնական գործերով։ Լսել եմ ԱԺ-ում Նիկոլ Փաշինյանի խայտառակ ելույթը, որն ինձ համար անընդունելի էր։ Վերադարձել եմ ու որոշել դիմել այդ քայլին։  Չկա որևէ ուղղորդվածություն։ Մեր պետության շահերը պաշտանելու համար որևէ ուղղորդավածություն պետք չէ, որևէ մեկի հետ պետք չէ խոսել»։