Ձեր վստահելի աղբյուրը

«Հայրենիք» կուսակցության ղեկավար Արթուր Վանեցյանը կոչ է անում լուրջ չընդունել Նիկոլ Փաշինյանի՝ կառավարության երեկվա նիստում արած հայտարարութունները:

«Լուրջ մի ընդունեք այդ հայտարարությունները, Փաշինյանը, տեսնելով երկրում սկսված այն շարժումը, որն ասում է՝  թույլ չենք տալու, որպեսզի Փաշինյանը գնա միակողմանի զիջումների, թույլ չենք տալու, որպեսզի Արցախը հանձնվի թշնամուն, նա շատ լավ գիտակցելով և այդ հոտառությունն ունի, որ չի կարողանալու այս ալիքի դեմն առնել, դրա համար հիմա փորձում է որոշակի հայտարարություններով այդ ամենը կասեցնել, բայց չի կարողանալու, որովհետև արդեն հանրությունը ճանաչում է նրան, ու որևէ մեկը չի հավատում ու լուրջ չի ընդունում նրան»,- Ազատության հրապարակում  լրագրողների հետ զրույցում ասաց Ա.Վանեցյանը:

Նրա խոսքով, Փաշինյանն այդպես էլ հստակ չձևակերպեց, որ Արցախը երբեք չի լինելու Ադրբեջանի կազմում, որ Հայաստանի տարածքներից, այսպես կոչված ադրբեջանիցների և իշխանությունների կողմից հաճախ օգտագործվող ադրբեջանական անկլավները չեն հանձնվելու թշնամուն, այլ խոսեց ինչ-որ պայմանական բառակապակցություններով, որ շեղի մարդկանց:

Արթուր Վանեցյանն ասաց, որ  քաղաքացիներն արդեն դուրս են եկել փողոց, մարդիկ օր-օրի շատանում են Ազատության հրապարակում, ամեն ինչ իր հունով գնում է:

«Մարդկանց մոտ փոխվել է գիտակցությունը, մարդկանց մոտ գրեթե 100 տոկոսանոց կոնսենսուս կա, որ Նիկոլ Փաշինյանը այլևս չպետք է կառավարի, քանի որ նրա յուրաքանչյուր ավելի օր իշխանության ղեկին մնալը, կործանարար է Հայաստանի  ու Արցախի համար: Կա մի խնդիր՝ քաղաքականապես այդ ամենը ձևակերպել, բայց դրա արդյունքին հասնելու համար էլ պետք է կարողանանք հանրությանը բացատրենք, որ սա իշխանության կռիվ չէ, անձերի կռիվ չէ, այլ՝  գաղափարի կռիվ է ՝ հանուն հայրենիքի»,-ասաց ընդդիմադիր քաղաքական գործիչը՝ հավելելով, որ իշխանության կողմից մարդկանց մեջ մտցրած բաժանարար գծերը  հենց վերացվեն, միանգամից լինելու է հանրային մեծ ճնշում, որը ստիպելու է Փաշինյանին հեռանալ։

Նա ասաց, որ դրան կարող են հասնել աշխատելով։

«Ադրեն յոթ օր Ազատության հրապարակում եմ։ Այստեղ գալիս են նախկինում  «Քաղաքացիական պայմանագիր»  կուսակցությանն աջակցող շատ քաղաքացիներ, անգամ ՔՊ նախկին անդամներ ու ասել՝ հասկանում են, որ սա կործանարար  իշխանությունը է այլևս, մենք չենք կարող իրենց հետ խոսել։ Այդ մարդիկ գալիս են գիշերային ժամերին, օրինակ, այսօր առավոտյան՝ ժամը 05:43, մեկը եկավ դիմակով, հետո ակնոցները մի քիչ բարձրացրեց, տեսա ով է՝ շոկի մեջ էի, ասացի՝ դու ի՞նչ  գործ ունես այստեղ, ասաց՝ «զզվել եմ սրանցից»,-ասաց Արթուր Վանեցյանը:

Նա նշեց, թե այդ անձը պետական պաշտոնյա չէ, բայց հանրային դաշտում շատ ակտիվ աջակցել է այս իշխանությանը:

Լրագրողների հարցին՝ տեղեկություն է  տարածվում, իբր ձեր օգնականը գումար է բաժանում ինչ-որ մարդկանց, նույնիսկ տեսանյութ կա, Վանեցյանը պատասխանեց. «Նոր ցույց տվեցին տեսանյութը։ Ձմեռվա հագուստով է, Սիրահարների այգու շրջակայքում փող մուրացող մարդիկ են, եկել են գումար են խնդրել, ինքն է տվել է։ Հերթական հիմարությունն է»։