Ձեր վստահելի աղբյուրը

«Մենք մեր դատի, մեր իրավունքների տերն ու պահանջատերն ենք, թույլ չենք տալու ներսում, դրսում հայ ժողովրդի հարատև ընթացքը փորձեն կասեցնել»,- Հանրապետության հրապարակում Ջահերով երթի մեկնարկին  ասաց երիտասարդ Դաշնակցականը։ 

«Զարթնի՛ր, լա՛ո» խորագորվ ջահերով երթին ներկա են նաև ՀՀ երկրորդ և երրորդ նախագահներ Ռոբերտ Քոչարյանն ու Սերժ Սարգսյանը։

ՀՅԴ ԳՄ ներկայացուցիչ Իշխան Սաղաթելյանն ասաց, որ այսօր մենք այստեղ ենք հայության իրավունքները պաշտպանելու, մեր հիշողությանը տեր կանգնելու, Հայոց ցեղասպանության զոհերի հիշատակը հարգելու, նոր ցեղասպանությունները կանխելու համար։

«Ակնհայտ է, որ «հիշում եմ և պահանջում» մեր համահայկական կարգախոսը վերջին տարիներին ձևախեղվում է, փորձ է արվում մեր ժողովրդի արդար պայքարը սահմանափակել զուտ հիշողության ձևակերպումով։ Այս իշխանությունը կատարելով թուրքական նախապայմանները՝ ցանկանում է  հրաժարվել մեր համահայկական պայքարից, Հայոց ցեղասպանության միջազգային ճանաչման և իրավունքների պաշտպանության սահմանադրական հանձնառությունից, ցանկանում է  հրաժարվել Արցախից, հայրենիքի դարպասները ցանկանում է  բացել թշնամու առջև։ Փուչ ու դատարակ են սրանց հավաստիացումները լավ ապագայի, տնտեսական շահի, խաղաղության դարաշրջանի վերաբերյալ։

Թույլ չենք տալու, որ այս իշխանությունը իր կործանարար քայլերով  քայքայի համահայկական մեր ճակատը, մեր անվտանգությունը, մեր պետականությունը, Արցախը, հայոց հիշողությունը։ Սա դիմադրության վճռական երթ է»,- հայտարարեց Ի. Սաղաթելյանը։

Նա նշեց, որ այս հրապարակից մեր տասնյակ հազարավոր ջահակիրների, վճռական հայության անունից դիմում են միջազգային հանրությանը՝ «սա է հայկական կամքը, սա է հայ ժողովրդի դիրքորոշումը, ոչ թե փակ դռների հետևում տարբեր մայրաքաղաքներում զիջումների պատրաստ իշխանության ղեկին հայտնված այդ խղճուկի խոստումները»։

«Այսօր այս հրապարակից հայ ժողովուրդն իր վճռական կամքն է արտահայտում ի լուր ամբողջ աշխարհի, թշնամիների, որ այս շենքում նստած խղճուկը չունի մանդատ ժողովրդի անունից մեր հայրենիքից նոր փայաբաժին հանելու»,- ասաց ՀՅԴ ԳՄ ներկայացուցիչը։

Դիմելով սփյուռքի միլիոնավոր հայրենակցիներին՝ նշեց, որ այս ջահերը,  տասնյակ հազարավոր հայաստանցիների ներկայությունը փաստում են, որ մեր իրավունքների պաշտպանությունը, Հայոց ցեղասպանության միջազգային ճանաչումը դադար չի ունենալու և միջազգային ճանաչման գործընթացը ոչ միայն սփյուռքի, այլ համայն հայության և Հայաստանի օրակարգն է։

Դիմելով արցախցիներին՝ Իշխան Սաղաթելյանն ասաց. «Դուք մենակ չեք, մայր հայրենիքը ձեռքերը չի լվացել Արցախից, սա է հայ ժողովրդի կարծիքն ու կամքը, ոչ թե մի քանի իշխանավորի թուրքական թեզերով հայտարարությունները։

Մենք միասին ենք, մեկ բռունցք ենք և մեկ ենք»։

Դիմելով ջահակիր երիտասարդությանը, որոնցից շատերը  2020 թվականին ջահերի փոխարեն զենք էին վերցրել ու պաշտպանել հայրենիքը, նրանց միացած տասնյակ հազարավոր քաղաքացիներին՝ ասաց. «Զանգը  հնչել է նոր Սարդարապատի, նոր Բաշ Ապարանի, նոր զարթոնքի զանգ է։ Մեզանից, մեր միասնականությանից, մեր վճռականությունից, մինչև վերջ գնալու կամքից է կախված, թե հետագա սերունդներն ինչպես կարտահայտվեն 2020-ականների մեր ապրած տարիների մասին։ Կլինենք համարձակ, միասնական, ըմբոստ, մեզ կհիշեն որպես պատմության անիվը շրջած հաջորդ սերունդներին ապրելու, արարելու հայրենիք փոխանցած սերունդ, եթե ոչ՝ վախկոտի խարանը բոլորիս շիրիմների վրա է լինելու հավերժ։

Չենք հանդուրժելու նման ճակատագիրը։ Ուրեմն ունենք մեկ ուղի՝ մեզ հետ պայքարի ենք հանում մեր հարևանին, բարեկամին, կուրսեցուն։

Համահայկական դիմադրություն, վստահ ենք՝ սա է հաղթանակի ճանապարհը։

Գնալու ենք մինչ վերջ, հեռացնելու ենք աղետաբեր այս իշխանությանը, վերականգնելու ենք մեր արժանապատվությանը։

Հանուն սրբադասված մեր նահատակների, հանուն Արցախի ու հանուն Հայաստանի, հայ ժողովրդի հավերժության՝ տար քո ջահը դեպի Ծիծեռնակաբերդ, տար դեպի վերջնական հաղթանակ»,- իր ելույթում ասաց Իշխան Սաղաթելյանը։