Ադրբեջանի նպատակը Արցախի հայաթափումն է. ՄԻՊ
«Մենք միանում ենք բոլոր մեր հայրենակիցներին՝ գլուխ խոնարհելով Հայոց Մեծ եղեռնի անմեղ զոհերի հիշատակին»,- Ծիծեռնակաբերդի բարձունքում լրագրողների հետ զրույցում ասաց ՀՀ մարդու իրավունքների պաշտպան Քրիստիննե Գրիգորյանը։
Նրա խոսքով՝ եթե չկա հանցագործությունների դատապարտում և մեղավորների պատիժ, ապա խոսք չի կարող գնալ արդյունավետ կանխարգելման մասին: «Խոսքը Թուրքիայի կողմից շարունակվող քաղաքականության մասին է, որ խիստ դատապարտելի է»,- ասաց նա։
Անդրադառնալով Սյունիքում առկա խնդիրներին՝ Քրիստիննե Գրիգորյանն ընդգծեց, որ Գորիսում, Կապանում, Դավիթ Բեկում մի շարք հանդիպումներ է ունեցել և այնտեղ, ըստ նրա, խնդիրները բազմաթիվ են։
«Առաջնայինը անվտանգային և ապահով միջավայր ունենալու խնդիրներն են: Մյուս խնդիրը տեղահանված անձանց արժանապատիվ կյանքի պայմանների, ինտեգրման, աշխատանքի, կրթության իրավունքի, սեփականության իրավունքի վերականգնման հարցերն են ու, բնականաբար, զինված ուժերում մարդու իրավունքների պաշտպանության հարցերը, որոնք պաշտպանի մանդատում են։ Պետք է ասեմ, որ ես դեռ հնարավորություն չեմ ունեցել այցելելու զորամասեր, բայց ռազմական հոսպիտալ եմ այցելել: Պաշտպանին առընթեր խորհրդի նիստ ենք արել, որտեղ բարձրացրել ենք այն սիստեմիկ խախտումների խնդիրները, վտանգները, որոնք Պաշտպանը տարեկան և արտահերթ զեկույցներով բարձրացրել է»,- ընդգծեց նա։
Քրիստիննե Գրիգորյանը տեղեկացրեց, որ պայմանավորվել է իրավասու մարմինների ու քաղհասարակության հետ, որ ԶՈւ-ում մարդու իրվունքների պաշտպանության խորհրդի աշխատանքները պետք է ակտիվացնել։
Հարցին, թե նախկին ՄԻՊ Արման Թաթոյանը երբ ներկայացնում էր, թե ինչպես են Ադրբեջանում վարվում հայ ռազմագերիների հետ, կարծիքների էին հնչում, որ դրանք տարբեր ֆիլմերի սցենարների են նման, հիմա որպես ՄԻՊ, արդյոք այդ փաստերն իրողություն են, Քրիստիննե Գրիգորյանն ասաց, որ այդ զեկույցը ուղղակիորեն փաստերի ներկայացում էր՝ նկարներով, տեսագրություններով, որոնք շոկային էին:
«21-րդ դարում մարդկային միտքը դժվար է պատկերացնում, որ նման ծայրահեղ անմարդկային վերաբերմունք կարելի է դրսևորել պատերազմի մասնակիցների, զինվորների, քաղաքացիական անձանց նկատմամբ: Այդ փաստերն արձանագրված են նաև գերությունից վերադարձած մեր տղաների հետ Պաշտպանի ունեցած զրույցների արդյունքներով: ՄԻՊ-ը առանձին զեկույց է հրապարակել այս մասով:
Մի քանի օր առաջ ԱԺ Մարդու իրավունքների հարցերի հանձնաժողովում ներկայացրել եմ նաև այդ զեկույցի հետևությունները՝ ևս մեկ անգամ շեշտելով, որ ՄԻՊ-ի հավաքագրած տվյալները, նաև վերջին 2-3 ամիսներին Արցախի բնակչության նկատմամբ ճնշումները, կրակոցները, նաև զոհերն ուղղակիորեն վկայում են, որ էթնիկ և կրոնական հիմքով հայի նկատմամբ ատելության քաղաքականությունն Ադրբեջանի պետության կողմից հովանավորվում է, իրականացվում է։ Ցավալի է արձանագրել, որ դրանց նպատակը ուղղակիորեն Արցախի հայաթափումն է»,- ասաց Մարդու իրավունքների պաշտպանը։
Լրահոս
Տեսանյութեր
«Գոյ» թատրոնի դերասանները դիմեցին ոստիկանություն
