Ձեր վստահելի աղբյուրը

ԱԺ քառօրյա նիստում «Ժառանգություն» խմբակցության ղեկավար Զարուհի Փոստանջյանի ու ՀՀԿ-ականների միջև բանավեճը շարունակվեց նաև «Տոների և հիշատակների մասին» օրինագծի քննարկման ժամանակ, որով առաջարկվում է Հայաստանում մայիսի 7-ը սահմանել երիտասարդության օր:

Զ. Փոստանջյանը հայտարարեց, որ  առաջարկվում է երիտասարդների տոն սահմանել, մինչդեռ Հայաստանում երիտասարդությունը երջանիկ չէ, իսկ դրա պատճառը, ըստ նրա, իշխանությունների վարած քաղաքականությունն է:

Աժ նախագահ Գալուստ Սահակյանը ընդհատեց  Փոստանջյանին և կոչ արեց, որ ամփոփի ելույթը. «Տիկի՛ն Փոստանջյան, մեղք եք, էս էրեխեքն էլ են մեղք (նկատի ուներ ԱԺ-ում գտնվող դպրոցականներին), հասարակությունն էլ: Կարճ ամփոփեք ձեր ելույթը»:

Զ.Փստանջյանն էլ նշեց, որ երիտասարդներին երջանիկ պահեր պետք է պարգևել ոչ թե տոների հիշատակի օր ընդունելով, այլ գործ անելով:

ՀՀԿ-ական կին պատգմավորները նույնպես սկսեցին դահլիճից ամոթանք տալ Զարուհի Փոստանջյանին: 

«Տիկին Ռուզաննա, բավարար է, ամոթ է»,- իր հերթին  պատգամավոր Ռուզաննա Մուրադյանին դիմեց Փոստանջյանը:

Այնուհետև շարունակեց. «Որպեսզի ունենանք երջանիկ ապագա, պայքարը պետք է շարունակել»:  

Զարուհի Փոստանջյանը հիշեցրեց, թե ինչպես էր երեկ Կենտրոնական ընտրական հանձնաժողովի մոտ խրտվիլակներ վառում։

«Խրտվիլակներն էդպես պետք է զբաղվեն»,- արձագանքեց Գալուստ Սահակյանը և անջատեց Զարուհի Փոստանջյանի խոսափողը, ինչը նրան չխանգարեց իր ելույթը շարունակել առանց խոսափողի՝ մնալով ամբիոնի մոտ:

ԱԺ նախագահը նրան ասաց, որ սա անհնազանդության տեղ չէ, սա Ազգային Ժողովի ամբիոնն է, այն պղծելու համար չէ:

«Անհարմար է, այս ամբիոնը պղծելու տեղ չէ, Դուք արդեն Չեբուրաշկայի կարգավիճակում եք»,- ասաց Գալուստ Սահակյանն ու ավելացրեց, որ եթե այսպես շարունակի, ապա նրան կզրկի նիստերից: