Ձեր վստահելի աղբյուրը

2022թ. առաջին եռամսյակում եռակի ավելացել են տեղեկություններ ստանալու և տարածելու իրավունքի խախտումները։ Ասուլիսում ասաց  Խոսքի ազատության պաշտպանության կոմիտեի նախագահ Աշոտ Մելիքյանը՝ ներկայացնելով Հայաստանում խոսքի ազատության վիճակի և լրագրողների ու ԶԼՄ-ների իրավունքների խախտումների մասին 2022թ. առաջին եռամսյակային զեկույցը։

«Այս թվերն ամբողջությամբ վկայում են այն ծանր իրավիճակի մասին, որ լրագրողները, փաստորեն, շատ մեծ դժվարությամբ են ստանում պաշտոնական տեղեկատվություն պետական մարմիններից, մենք շարունակ ստանում ենք դրա հետ կապված բողոքները, փաստերը։

Այդ առումով մեր մտահոգությունն ենք հայտնում»,- ասաց Ա. Մելիքյանը։

Նրա խոսքով, շատ ժամանակ նույնիսկ դա կարող է  պատճառ հանդիսանալ տեղեկատվական դաշտում ապատեղեկատվության տարածման համար։ 

«Միշտ չէ, որ ապատեղեկատվությունը հենց պայմանավորված է լինում միտումնավոր, ֆեյք լուրեր հորինելով ու տարածելով։ Հաճախ լրագրողն ուզում է պետական ատյաններից ստանալ ստույգ  տեղեկատվություն կամ պետական ատյանի եղած տեղեկատվությունը և չունենալով դա՝ ավելի շատ է տուրք տալիս այլ աղբյուրներից  ստացած  տեղեկություններին, որոնք կարող են հստակ, ճշգրիտ չլինել և այլն»,- ասաց Խոսքի ազատության պաշտպանության կոմիտեի նախագահը։

Նա նշեց, որ պետական ատյանները, առհասարակ իշխանությունները պետք է լուրջ մտածեն սրա մասին, կազմակերպեն նախարարություններում, գերատեսչություններում հասարակայնության և մամուլի հետ կապերի, մամուլի խոսնակների աշխատանքը։

«Այսօր սա լուրջ խնդիր է տեղեկատվական դաշտում, որը պետք է լուծվի»,- ասաց Մելիքյանը։