Ձեր վստահելի աղբյուրը

Կիևը ԱՄՆ վարչակազմին խնդրում է ամսական առնվազն 2 մլրդ դոլար արտակարգ տնտեսական օգնություն ցուցաբերել՝ հայտարարելով, որ առանց այդ միջոցների Ուկրաինայում հումանիտար ճգնաժամը կարող է խորանալ: Այս մասին ՏԱՍՍ-ի փոխանցմամբ, գրել է The Washington Post թերթը՝ վկայակոչելով Ուկրաինայի ֆինանսների նախարար Սերգեյ Մարչենկոյին։

«Մենք պետք է լրացնենք այս բացը հենց հիմա, որպեսզի ներգրավենք անհրաժեշտ ֆինանսավորումը և հաղթենք այս պատերազմում»,-ասել է նախարարը։

Նրա խոսքով՝ տնտեսական աջակցությունն անհրաժեշտ է, որպեսզի պետությունը կարողանա շարունակել վճարել թոշակները, առողջապահության և կրթության ոլորտի աշխատողների աշխատավարձերը, ինչպես նաև հոգալ այլ մարդասիրական կարիքները:

Ըստ The Washington Post-ի, Վաշինգտոն կատարած այցի ժամանակ Մարչենկոն ԱՄՆ պաշտոնյաների հետ հանդիպումների ժամանակ հայտարարել է, որ Կիևին ամսական առնվազն 5 միլիարդ դոլարի միջազգային օգնություն է անհրաժեշտ՝ ապրիլ, մայիս և հունիս ամիսներին իր հրատապ ծախսերը վճարելու համար, որից 2 մլրդ դոլարը կուղղվեր ԱՄՆ-ից:

Բացի այդ, ապագայում սպասվում է լրացուցիչ հարցում, որը վերաբերում է երկրի վերականգնման ավելի երկարաժամկետ կարիքներին:

Անցած շաբաթվա վերջին ԱՄՆ նախագահ Ջո Բայդենը հայտարարել էր, որ Վաշինգտոնը լրացուցիչ 500 մլն դոլար կհատկացնի Կիևին տնտեսական օգնության տեսքով։ ԱՄՆ-ի ղեկավարը ճշտել է, որ այդ միջոցները Կիևին տրամադրում են տնտեսության կայունացման, աշխատավարձերի վճարման և բնակչությանը անհրաժեշտ ծառայություններ մատուցելու համար: