Հարց կա՝ վճռակա՞ն է արդյոք ընդդիմությունը հասարակության հույսերն իրականացնելու համար. Ավետիք Իշխանյան
«Մեր պապերը տեսել են ողբերգությունը, իսկ մենք տեսել ենք ողբերգության կեսը և այսօր կանգնած ենք ավելի մեծ ողբերգության առաջ: Ես այդ զգացողությունն ունեմ»,-Այլընտրանքային նախագծեր խմբի պանելային քննարկման ժամանակ հայտարարեց իրավապաշտպան Ավետիք Իշխանյանը:
Նա իր զարմանքն հայտնեց, որ 2020 թվականին սկսված մղձավանջն այսօր շարունակվում է, որ նման պարտությունից հետո որևէ ժողովուրդ չէր հանդուրժի պարտված իշխանություն, բայց Հայաստանում հանդուրժեցին, բայց և համոզմունք հայտնեց, որ ընտրությունները կեղծվել էին:
«Նա չի ստացել այնքան ձայն: Ունենալով իր թիմում այնպիսի գործիքներ, ինչպիսին է Գագիկ Ջհանգիրյանը, այդտեղ մնացածը տեխնիկայի հարց էր սարքել այնքան ձայն, ինչքան Փաշինյանին էր անհրաժեշտ: Ովքեր զգացել են վարչապետ կոչեցյալ երևույթի էությունը, նրանք երբևե չէին գնա արտահերթ ընտրությունների, եթե իմանային, որ նա մնալու է իշխանության: Այսինքը՝ նախորդ տարին ցույց տվեց մեր հասարակության թուլությունը և մեր ընդդիմադիր 17-ից ավել կուսակցությունների և դաշինքների սնանկությունը, վճռականության պակասը: Դրան հաջորդեց մեր նվաստացումների շարքը, որին մենք այսօր հասել ենք»,-ասաց բանախոսը:
Ավետիք Իշխանյանի խոսքով՝ վերջին հարյուրամյակներում հայկական քաղաքական մտքում եղել է երկու ծայրահեղ մոտեցում Ռուսաստանի նկատմամբ՝ մի դեպքում եղել է ծայրահեղ քծնողական, մյուսի դեպքում՝ թշնամական:
«Քծնողական՝ երբ դու Ռուսաստանի համար դառնում ես մանրադրամ, որ կարող է քեզ օգտագործել ի շահ իրեն և պահել իր կազմում: Մյուս՝ թշնամական պահվածքի դեպքում քեզ կարող է ոչնչացնել: Ես համոզված եմ, որ այս պատերազմը եղավ Ռուսաստանի հետ թշնամանալու պարագայում: Հատուկ ծրագրով թշնամացան Ռուսաստանի հետ և նվեր տվեցին Ալիևին՝ պատերազմ սկսելու համար: Ես շատ անհանգստանում եմ, որ հնարավոր իշխանափոխության դեպքում մենք ունենանք մյուս ծայրահեղությունը: Այն նույնպես շատ վտանգավոր է, քանի որ մեր այս ծանր վիճակում հարցերը լուծելու դեպքում, Ռուսաստանը դրանք կլուծի ի օգուտ մեր հակառակորդների, քանի որ կգործի «куда мы денемся» սկզբունքը»,-ասաց Իշխանյանը:
Նա ցանկություն հայտնեց, որ ընդդիմությունն այդ հարցը քննարկեր և ընդուներ Ռուսաստանի վստահելի դաշնակցի կեցվածք, որը սակայն չնշանակեր, որ ամեն հարցում համաձայնելու է նրա հետ և չնշանակեր թշնամանալ Արևմուտքի հետ:
Իշխանյանը հույս հայտնեց, որ իշխանափոխությունից հետո նորերը չպետք է ասեն, թե չեն կարող այս բանն անել, քանի որ նման վիճակ են ժառանգել և հայտարարեց, որ եթե նման պատճառաբանություն պետք է արվի, ուրեմն ընդհանրապես իշխանափոխություն պետք չէ, քանի որ նույն բանն այսօր ասում է Նիկոլ Փաշինանը:
«Իշխանափոխության դեպքում ապագա հնարավոր իշխանության հավաքական կերպարը պետք է այսօր արդեն ասի, որ չի գնա զիջման և թվարկի չզիջելու կետերը: Այո, նրան բաժին է ընկնելու ավերակներ,այդ ավերաները պետք է դարձնել շենքեր: Պատրա՞ստ է դրան ընդդիմությունը, թե՞ միայն իշխանափոխության համար է: Երբեք չի կարելի ներել այն նոր իշխանությանը, որը կգա և կասի, թե ոչինչ չէր կարող անել, քանի որ պայմանավորվածություններն արդեն կային:
Ես շատ կուզենայի, որ ընդդիմությունն առաժմ մտքում չունենար իշխանության մասին հարցը: Լինի իշխանափոխություն, կազմավորվի վերկուսակցական մարմին, որն ունենա տարբեր ստորաբաժանումներ և հստակ աշխատի»,-ասաց իրավապաշտպանը:
:
Նա սխալ համարեց անընդհատ ժողովրդին հիշելու ընդդիմության գործելաոճը և մեջբերեց Թումանյանի խոսքը. «Հանգիստ թողեք ժողովրդին»: Ավետիք Իշխանյանը հիշեցրեց, որ Հայաստանի այսօրվա պետականությունը շնորհիվ Արամ Մանուկյանի է, որը դուրս եկավ ժողովրդի մեծամասնության դեմ և փրկեց նրան:
«Ընդդիմությունը ոչ թե պետք է մտածի մեծամասնություն կազմելու մասին, այլ պետք է հստակ ծրագիր ունենա և թեկուզ փոքրամասնությամբ իշխանություն փոխի: Փոքրամասնությունը պետք է փրկի մեծամասնությանը: Ընդդիմությունը պետք է լինի վճռական, քանի որ վարչապետ կոչեցյալը վճռական է իր աթոռը պահելու հարցում: Սարսափելի վախկոտ է, նույնիսկ ջուր է իր հետ տանում Մոսկվա, որպեսզի չթունավորվի: Այդ վախկոտ անձնավորությունը պատարստ է ամեն ինչի, բայց միշտ ելք կա, եթե լինենք վճռական:
Հնարվոր ողբերգության դեպքում՝ բոլորս ենք պատասխան տալու: Այդ ժամանակ չի կարելի ասել, որ իշխանությունն էր միայն պատասխանատու: Բա դու ի՞նչ էիր անում, որ իշխանության ձեռքը չբռնեցիր: Սա վերաբերում է բոլորիս:
Հասարակության մեջ շատ մեծ դժգոհություն կա իրավիճակի հետ կապված և նա սպասումների մեջ է, հուսեր ունի որ հնարավոր է փոփոխություններ անել, և հարց է առաջանում՝ վճռակա՞ն է արդյոք ընդդիմությունն հասարկության հույսերն իրականացնելու համար»,-խոսքն ամփոփեց իրավապաշտպանը:
