Ձեր վստահելի աղբյուրը

«Իշխանությունները հերթական անգամ ստում են, նոր պատերազմի թեզն առաջ տանելով փորձում են ահաբեկել մեր բնակչությանը։ Նոր պատերազմ լինելու է, եթե իրենք մնան իշխանության»,- Ազատության հրապարկում լրագրողներին ասաց «Հայրենիք» կուսակցության նախագահ Արթուր Վանեցյանը՝ պատասխանելով հարցին, թե իշխանական պատգամավորները մեղադրում են ընդդիմության նոր պատերազմ հրահրելու մեջ։

Նա նշեց, որ պատերազմը շարունակվում է, երկու օր առաջ ևս հայ զինծառայող է գերեվարվել։

«Ստերով, խաբելով, մանիպուլացնելով հնարավոր չէ մարդկանց լռեցնել։ Դա իրենց հերթական ահաբեկումն է ժողովրդին, որ լինելու է  պատերազմ։ Չի լինելու պատերազմ։ Մենք ունակ ենք կանխել պատերազմը, մենք  խաղաղության կողմնակից ենք, բայց այդ խաղաղությունը չպետք է լինի ի հաշիվ Հայաստանի, Արցախի տարածքային ամբողջականության, միակողմանի  զիջումների։ Հայը պետք է իր արժանապատվությունը վերականգնի»,- ասաց Վանեցյանը։

Ինչ վերաբերում է ընդդիմության կողմից Հայոց ցեղասպանության հարցի շահարկումների վերաբերյալ իշխանության մեղադրանքներին, ընդդիմադիր գործիչը հիշեցրեց իշխանավորներին նրանց քաղաքական թիմի ղեկավարի հրապարակային հայտարարությունը, որ Հայոց ցեղասպանության  հարցով այլևս չպետք է զբաղվի Հայաստանը, այլ պետք է զբաղվեն Սփյուռքի կառույցները։

«Իշխանության կռիվ չէ այստեղ, մենք ասել ենք ու շարունակում ենք պնդել։ Ես և իմ գործընկերներն իշխանության համար չենք պայքարում։ Բոլորս էլ հայտարարել ենք ապակենտրոն, ցանցային պայքարի մասին, այստեղ չկան ընդգծված առաջնորդներ, մենք այստեղ ենք ոչ մեր կուսակցական դրոշներով, այլ որպես Հայաստանի քաղաքացիներ, որոնք բարձրաձայնում են ստեղծված իրավիճակի մասին։

Այո, իրականում պետք է լինի քաղաքական լուծում, բայց մենք տեսնում ենք, որ տարբեր խմբեր են միացել այս պայքարին։ Կեղծ պնդում է,  որ պայքար է իշխանության համար, պայքար է հանուն հայրենիքի, հանուն Արցախի ու Հայաստանի»,- ասաց Արթուր Վանեցյանը։