Ձեր վստահելի աղբյուրը

«Ներկայիս իրավիճակը մի շարք գործոնների հետևանք է՝ պատերազմ , պարտություն ազգային վիրավորվածություն, իշխանությունների կոպիտ սխալներ, կենսամակարդակի անկում և ամենաքայքայիչը՝ ոնորոշություն»,-Այլընտրանքային նախագծեր խմբի նախաձեռնած քննարկման ժամանակ ասաց ԱԺ նախկին պատգամավոր ԲՀԿ անդամ Շաքե Իսայան և համոզմունք հայտնեց, որ այս վիճակն ավելի է խորանում:

Նրա խոսքով՝ պետք է գիտակցել, որ այսօր ոչ միան Հայաստանի ներսում, այլ նաև նրա շուրջ են տեղի ունենում գործընթացներ, որ աշխարհն անկայունության և կոնֆլիկտային փուլի մեջ է:

«Մենք պետք է ամեն ինչ անենք, որ թե՛ մեր երկրի ներսում, թե՛ նրա շուրջ տեղի ունեցող գործընթացները որևէ փուլում հանկարծ չհակադրվեն: Եթե դրանք հակադրվեն, ապա այն մեր պետության համար կարող է ճակատագրական լինել: Մենք այսօր Հայաստանում ունենք սոցիալ-տնտեսական բազմաթիվ խնդիրներ, ամեն օր տեսնում ենք, որ մարդկանց վիճակն ակնհայտորեն էլ ավելի է վատանում: Արտահերթ ընտրություններից հետո ցասումն էլ ավելի է ուժգնանում, քաղաքացիները դժգոհում են: Ոչ միայն մենք, այլև այն բոլոր պետությունները, որոնք այսպիսի  լուրջ մարտահրավերների առաջ են կանգնած, կկարողանան հաղթահարել դրանք, եթե ունակ լինեն սառը գլխով հաշվարկ կատարել, մտածել: Կարծում եմ, որ հիմա մեզ  պակասում է հստակ հաշվարկները և գաղափարները, քաղաքական բովանդակությունը, որն այսօր կարող է բերել լուծումների»:

Տեղեկացնելով, որ քաղաքացիներն անընդհատ ուզում են հասկանալ, թե սկսված գործընթացներից հետո իրենց ինչ է առաջարկվելու, թե արդյո՞ք լինելու է միայն իշխանափոխություն, թե՞ բոլոր խնդիրներն լուծվելու են՝ բանախոսն ասաց. «Մենք անընդհատ խոսում ենք, որ անվտանգային նոր մարտահրավերների առաջ ենք կանգնած, որ ամեն օր սոցիալ-տնտեսական վիճակն էլ ավելի է ծանրանում, բայց երբ բարձրաձայնում ենք փոփոխության հարցը, կարծես առաջնային կարևորում ենք իշխանափոխությունը և դրա տակ չենք դնում այն հաշվարկները, որոնք պետք է անեն ընդդիմությունը և բոլորս: Մեկ պարզ իրաղություն կա, մեր երկիրը պատմական փոփոխությունների անհրաժեշտության առաջ է կանգնել 2020 թվականի նոյեմբերի 9-ից հետո: Պետք է ամեն ինչ անենք, հաշվարկված, բովանդակային, գաղափարական հենքով, որպեսզի ունենանք փոփոխություններ մեր երկրում, որովհետև, այն պրոցեսները, որոնք տեղի են ունենում աշխարհում, իրենց խորը հետքը կթողնեն նաև մեր երկրի վրա»:

 Շաքե Իսայանը նշեց, որ ցանկացած ազնիվ մղման մեջ եթե լինեն սառը հաշվարկներ, ապա դրանք կարող են  հաջողել:

«Երկիրը հնարվոր ցնցումներից զերծ պահելու, բայց միաժամանակ փոփոխություններ ունենալու համար պետք է կազմակերպենք արտահերթ ընտրություններ: Պետք է ստանձնել այդ պատասխանատվությունը՝ վերջիվերջո փոփոխություններ ունենալու: Հնարավոր է, որ այդ դեպքում նորից այսօրվա իշխանությունը վերարտադրվի: Աշխարհում այդպիսի  պրակտիկա կա, պետք լինի 2, 3, 4 արտահերթ ընտրություններ պետք է կատարել, մինչև ունենանք այն գաղափարական հենքը և սառը հաշվարկը, որի մասին խոսում էի, որովհետև եթե այստեղ խնդիրը մեկ անձին մեկ այլ անձով փոխելն է, ապա այն հնարավոր է անել, գուցե նաև՝ ավելի կարճ ժամկետներում, բայց դրանով չեն լուծվելու անվտանգային, սոցիալ-տնտեսական մարտահրավերները, որոնց առաջ կանգնած ենք և ամեն օր էլ ավելի ենք խորանում դրանց մեջ»,-հայտարարեց ԱԺ նախկին պատգամավորը: