Ձեր վստահելի աղբյուրը

«Որպես հանձնաժողովի նախագահի տեղակալ այսօրվա նիստը ես կանցկացնեմ, իսկ պարոն Հակոբյանի՝ նիստին չմասնացելու պատճառների մասին հետո առանձին կխոսենք»,-Տնտեսական հարցերի մշտական հանձնաժողովի այսօրվա նիստի մեկնարկին հայտարարեց հանձնաժողովի փոխնախագահ Բաբկեն Թունյանը՝ անդրադառնալով հանձնաժողովի նախագահ, «Հայաստան» խմբակցության պատգամավոր Վահե Հակոբյանի բացակայությանը:

Հիշեցնենք, որ Վահե Հակոբյանը մասնակցում է «Դիմադրության» շարժման ակցիաներինև չի այցելու ԱԺ:

Հանձնաժողովի օրակարգի առաջին հարցը՝ ՀՀ քաղաքացիական օրենսգրքում լրացում կատարելու մասին նախագիծը զեկուցեց ՔՊ պատգամավոր Գևորգ Պապոյանը:

Նրա խոսքով՝ Քաղաքացիական օրենսգրքում փոփոխություն կատարելու անհրաժեշտությունն առաջացել է՝ «Բաժնետիրական ընկերությունների մասին» օրենքում 2019թ.-ին փոփոխություններ կատարելու մասին օրենքի ընդունումից հետո, որի համաձայն 2020 թվականի հունվարի 1-ից ԲԲԸ-ների ֆինանսական հաշվետվությունները հրապարակման ենթակա չեն, բացառությամբ այն ԲԲԸ-ների, որոնք «Հաշվապահական հաշվառման մասին» ՀՀ օրենքի համաձայն համարվում են հանրային հետաքրքություն ներկայացնող կազմակերպություններ կամ բավարարում են նույն օրենքով սահմանված քանակային որոշ չափանիշների,օրինակ՝ գործունեությունից հասույթ, ակտիվների հաշվեկշռային արժեք, աշխատողների թվաքանակ:

Գևորգ Պապոյանը հայտնեց, որ ընդունված «Բաժնետիրական ընկերությունների մասին» օրենքում փոփոխություններ կատարելու մասին օրենքի նպատակը եղել է՝ հստակեցնել պարտադիր աուդիտի ենթակա կազմակերպությունների շրջանակը՝ աուդիտի պահանջը տարածելու իրապես հանրային հաշվետվողականություն ունեցող կազմակերպությունների, այլ ոչ թե ֆորմալ առումով օրենքի պահանջին բավարարող կազմակերպությունների նկատմամբ, որի արդյունքում «Բաժնետիրական ընկերությունների մասին» օրենքում ԲԲԸ-ների ֆինանսական հաշվետվությունների պարտադիր հրապարակման դրույթն ուժը կորցրած է ճանաչվել:

Ըստ ՔՊ պատգամավորի ներկայացրած հիմնավորման՝ Քաղաքացիական օրենսգրքում շարունակում է գործել դրույթ, որով ԲԲԸ-ներին պարտավորեցնում են ամեն տարի հրապարակել տարեկան հաշվետվությունները և հաշվապահական հաշվեկշիռները:

«Ներկայումս ԲԲԸ-ների գերակշիռ մասը որևէ գործունեություն չիրականացնող կազմակերպություններ են, որոնց ֆինանսական հաշվտեվությունների հրապարակումը ՀՀ քաղաքացիական օրենսգրքին համապատասխան` ֆորմալ բնույթ է կրում: Նախագծի նպատակն է ֆինանսական հաշվետվությունների հրապարակման պահանջը տարածել այն ԲԲԸ-ների վրա, որոնք ներկայացնում են հանրային հետաքրքրություն կամ բավարարում են օրենքով սահմանված քանակային որոշ չափանիշների»,-հայտարարեց ՔՊ պատգամավորը:

Չնայած ֆինանսների նախարարի տեղակալ Արման Պողոսյանն ասաց, որ կառավարությունը նախաձեռնել է նույն խնդրի կարգավորման այլ՝ հիմնարար տարբերակ՝ հանձնաժողովի ՔՊ-ական պատգամավորները կողմ քվեարկեցին Գևորգ Պապոյանի նախագծին: