Ձեր վստահելի աղբյուրը

44-օրյա պատերազմի ժամանակ Մատաղիսում զոհված ավագ լեյտենանտ Լևոն Ավետիսյանի հայրը՝ Միսակ Ավետիսյանը, ով ապրիլի 25-ից հացադուլ էր հայտարարել, զոհված զինծառայողների ծնողների հորդորով դադարեցրել է հացադուլը։

«Զոհված զինծառայողների ծնողների հորդորով դադարեցնում եմ հացադուլը, միանում եմ իրենց պայքարին, հուսով եմ չեք հուսախաբվել իմ խոսքերից։ Ինչ-որ ասել եմ, ուժի մեջ է, ինչ-որ լինելու է, հաստատ լինելու է»,-Ազատության հրապարակում լրագրողներին ասաց Մ.Ավետիսյանը։

Նրա շուրջ հավաքված զոհված զինծառայողներից մեկի հարազատն ասաց, որ Միսակ Ավետիսյանը չմերժեց իրենց հորդորը և դադարեցրեց հացադուլը. «Նա իր պայքարի տերն է, մենք էլ մեր պայքարի տերն ենք և գնալու ենք մինչև վերջ»։

Զոհված զինծառայողներից մեկի հայրը շնորհակալություն հայտնեց, որ իրենց բախտակիցը չմերժեց իրենց։

«Եթե մոտակա օրերս չձերբակալվեց, հրաժարական չտվեց, չփախավ, հաստատ մայիսի 8-ին մեր ձեռքից չի փախնելու։ Շուշիի ազատագրման օրը ինքը վարչապետ չի նստելու։ Շուշին դժգույն, դժբախտ քաղաք համարողն իրավունք չունի հայոց վարչապետ կոչվելու»,-ասաց Միսակ Ավետիսյանը։

Հիշեցնենք, որ ապրիլի 25-ին Միսակ Ավետիսյանը հացադուլ էր սկսել՝ հայտարարելով. «Մինչև մայիսի 8-ը հացադուլ եմ անելու, իսկ մայիսի 8-ին կգնամ  ավելի ծայրահեղ քայլի՝ Շուշիի ազատագրման օրը պատրաստվում եմ ինձ հրկիզել Հանրապետության հրապարակում։ Ես դրան պատրաստ եմ ու ուզում եմ դիմել ՀՀ դատախազությանը, ԱԱԾ-ին, որ ձերբակալեն դավաճանին, Հայաստանում վարչապետ նստած այդ թշնամու գործակալին»։