Ձեր վստահելի աղբյուրը

Այսօր ժամը 18։30-ին Գյումրիի Շառլ Ազնավուր հրապարակից կմեկնարկի Դիմադրության ևս մեկ երթ։ Այս մասին հայտնում է ՀՅԴ ԳՄ ներկայացուցիչ Իշխան Սաղաթելյանը։

«Իսկ մենք հանդիպում ենք նույն ժամին՝ 18։30-ին, Երևանի Հանրապետության հրապարակ մետրոյի կայարանի հարևանությամբ՝ Արամ Մանուկյանի արձանի մոտ»,- գրել է Սաղաթելյանը։

Իջևանից Երևան ուղևորվող «Դիմադրության» շարժման իրազեկման քայլեթի մասնակիցների հետ հանդիպմանը նա ասել է, որ մայիսի 1-ից սկսելու են անհնազանդության բողոքի ացիաների շարք, որի արդյունքում հանրային և ժողովրդային ճնշման տակ այս իշխանությունը պետք է հեռանա։

«Մեր երկրի առջև կանգնած են բազմաթիվ խնդիրներ, լուրջ անվտանգային սպառնալիքի առջև ենք կանգնած, իրականում Հայաստանի լինելության հարցն է դրված։ Սա չափազանցություն չէ, փաստ է, իրականություն։ Այս իշխանությունն ասում է՝ հույս չունենաք, որ Արցախը լինելու է Հայաստանի կազմում, ինչը շարունակ ասել է Ալիևը»,- նշել է նա։

Ի.Սաղաթելյանն ընդգծել է՝ սա սրբազան պայքար է, այլընտրանք, հետքայլ չկա, գնում են մինչև վերջ։

«Ժողովուրդը ոտքի է կանգնում։ Մեր խնդիրն է՝ մինչև մայիսի 1-ը մեր ողջ ժողովրդին ոտքի ենք հանում, իսկ մայիսի 1-ից անցնում ենք համընդհանուր անհնազանդության բողոքի ակցիաների։ Այս կապիտուլյանտին պետք է ենթարկենք կապիտուլյացիայի, այլ տարբերակ չկա, եթե սրանք մնացին, վերջնականապես կորցնելու ենք ամեն ինչ։

Հետ կանգնող չի լինելու, ժողովուրդը ոտքի է կանգնել ու այս ընթացքը կասեցնել հնարավոր չէ։ Մեզ անհրաժեշտ է  կազմակերպված, քայլ առ քայլ մոտենալ այդ բեկումնային պահին, այդ պահը բաց չենք թողնելու, իրականացնելու ենք միասին»,- ասաց ընդդիմադիր քաղաքական գործիչը։