Ձեր վստահելի աղբյուրը

«Լավ ապրելու խոստումներով իշխանությունը զավթեցին այսօրվա իշխանավորները։ Ասացին, որ գազը, հոսանքը, սնունդը էժանանալու է, աշխատավարձը բարձրանալու է։ Ասացին՝ ունեն կախարդական փայտիկ, այն կօգնի ավելի լավ ապրել»,-Ազատության հրապարակում պատասխանելով Panorama.am-ի հարցին՝ ասաց «Հայրենիք» կուսակցության նախագահ, ԱԺ ընդդիմադիր պատգամավոր Արթուր Վանեցյանը։

Panorama.am-ն ընդդիմադիր գործչից հարցրեց՝ այս օրերին շատ են զուգահեռներ անցկացնում ընդդիմության ակցիաների և 2018-ի իրադարձությունների միջև: Չորս տարի առաջ մարդիկ ավելի լավ Հայաստան էին ուզում կառուցել, ուզում էին լավ ապրել: Ի՞նչ ունենք այսօր, ի՞նչ եք Դուք հասկանում «լավ ապրել» ասելով։

Վանեցյանն արձագանքեց, որ 2018 թվականին տասնյակ հազարավոր քաղաքացիներ լավ ապրելու ցանկությամբ ու ակնկալիքով դուրս եկան փողոց և ստիպեցին, որ իշխանությունը փոխվի։
«Ես շատ լավ հասկանում եմ այդ մարդկանց, կային խնդիրներ, կար մարդկանց մի մեծ բանակ, որ իրենց բոլոր դժբախտությունները կապում էին իշխանությունների հետ»,-նշեց նա։

Ի՞նչ ունենք այսօր։

«Հոսանքը թանկացել է, գազը թանկացել է, տնտեսական բոլոր ցուցանիշները վատացել են, աշխատավարձերը չեն բարձրացել, բարձրացել են բացառապես չինովնիկների աշխատավարձերը, մարդիկ սկսել են վատ ապրել»,-ասաց Նիկոլ Փաշինյանի հրաժարականի պահանջով ու հանուն հայրենիքի պայքարի դուրս եկած գործիչը։

Նա ներկայացրեց  լավ ապրելու իր բանաձևը։

«Լավ ապրելը միայն աշխատավարձի բարձրացումն ու լավ ուտելը չէ։ Անվտանգ միջավայրն է, անվտանգության երկարաժամկետ ու կայուն երաշխիքների առկայությունը, որպեսզի մարդը կարողանա պլանավորել իր ապագան։ Այսօր ի՞նչ ունենք։ Ունենք արտագաղթ, որովհետև անվտանգություն չունենք, ունենք մարդկանց մի հոծ զանգված, որոնք ասում են՝ հնարավորության դեպքում կարտագաղթեն, մարդիկ չունեն վաղվա օրվա հանդեպ հավատ։ Մարդիկ ամեն օր ապրում են պատերազմի սպառնալիքի ներքո, իշխանություններն ամեն օր պատերազմով են սպառնում, որ մարդիկ ձայն չհանեն։ Բայց այդպես չպետք է լինի»,-ասաց Վանեցյանը։

Ըստ բանախոսի, լավ ապրելը պետք է բաղկացած լինի մի քանի գործոններից՝ անվտանգային համակարգի առկայություն, պետության կողմից պետք է աշխատելու ու բարեկեցիկ ապրելու պայմանների ստեղծում, կրթության համակարգում բարեփոխումների իրականացում, որ մարդիկ իրենց երեխաների ապագան տեսնեն Հայաստանում։

«Փաստենք, որ այս մարդիկ լավ ապրելու խոստումներով եկան իշխանության, և այդ խոստումներից որևէ մեկը չի իրականացել։ Ունեցել ենք պատերազմ, զոհեր, թանկացումներ, տնտեսական անկում։ Այս իշխանությունները ձախողել են բոլոր ոլորտներում»,-ասաց նա։