Ձեր վստահելի աղբյուրը

ՀՅԴ ԳՄ ներկայացուցիչ, «Հայաստան» դաշինքի անդամ Իշխան Սաղաթելյանն ասուլիսում անդրադարձավ իշխանությունների կողմից ամենից շատ շրջանառվող թեզին՝ եթե ընդդիմությունը գա իշխանության, նոր պատերազմ կսկսվի։

«Սա հիմնական թեզն է, որ օրվա իշխանությունը փորձում է ժողովրդին վախեցնել։ Ասում են՝ եթե մենք չեղանք, տեղի է ունենալու պատերազմ։ Այսինքն, շարունակում են Ալիևով վախեցնել մեր ժողովրդին։ Եթե սրանք մնան, կտոր-կտոր, մաս առ մաս կորցնելու ենք և Արցախը, և Հայաստանը, և, առհասարակ, հայոց պետականությունը», - ասաց Իշխան Սաղաթելյանը։

Նա ընդգծեց՝ ստեղծված իրավիճակում ելք կա. եթե Հայաստանում լինի ազգային իշխանություն, ունենա կամք ու վճռականություն, լինի արդյունավետ կառավարում, նաև արտաքին ճիշտ  քաղաքականություն վարվի։

«Պատերազմը, պատերազմի արդյունքը  ճակատագիր, դատավճիռ չէ, աշխարհում  բազմաթիվ երկրներ ու պետություններ ունեցել են իրենց պատմության ընթացքում պարտություններ, բայց որևէ երկրում պարտված իշխանությունը չի վերաարտադրվել, կամ ինքնասպան է եղել, կամ ժողովուրդն իրեն հեռացրել է»,- ասաց Ի.Սաղաթելյանը։

Ընդդիմադիր քաղաքական գործչի խոսքով, Հայաստանը ցույց է տվել, որ կարող է շատ բարձր մակարդակի հարաբերություններ ունենալ մեր թիվ մեկ ռազմավարական և դաշնակցային գործընկերոջ Ռուսաստանի հետ, շատ բարձր մակարդակի հարաբերություններ ունենալ մեր հարևան Իրանի և Վրաստանի հետ, արդյունավետ ու բարձր համագործակցություն վարել արևմտյան երկրների, նաև ԱՄՆ-ի հետ։

«Իսկ այս մարդն իր ժուլիկությամբ ուզում է նաև արտաքին քաղաքականություն վարել. գնում է  Բրյուսել, մի բան է ասում, գնում է Մոսկվա՝ ասում է  մեկ այլ բան, Վաշինգտոնում՝ մեկ այլ բան, Հայաստանում  հրավիրում է  անվտանգության խորհրդի նիստ կամ Արցախի իշխանություններին, լրիվ այլ բան է ասում։ 

Մենք պետք է շատ բարձր մակարդակի հարաբերություններ ունենանք Ռուսաստանի հետ, նաև Իրանի ու Չինաստանի, արևմտյան մեր գործընկերների հետ։ Մենք այն տարիներին չենք գնացել ամեն մայրաքաղաքում մի բան խոսք տվել։ Շատ պարզ բոլորին բացատրվել է, որ Ռուսաստանը մեր թիվ մեկ ռազմավարական դաշնակիցն է, մեր անվտանգային համակարգը կապված է այդ երկրի հետ, բայց նաև շատ արդյունավետ և լայն համագործակցություն ենք ունեցել եվրոպական երկրների հետ։ Մենք շատ հասկանալի ու կանխատեսելի արտաքին քաղաքականություն ենք վարել։ Հիմա ևս դա կարող ենք անել։

Այդ ինչո՞ւ միջազգային հանրությունը սկսեց միանգանից փոխվել, որովհետև Հայաստանի ղեկին հայտնվել է մի քաղաքական ժուլիկ, որն այդ ճանապարհով փորձում է հարաբերություններ կարգավորել։ Արդյունքում մենք կորցրեցինք մեր բոլոր գործընկերներին։ Որևէ գործընկեր ձեռք չբերեցինք՝ բացի Ալիևից և Էրդողանից։ Այսօր Փաշինյանի իշխանության մնալու համար այդ երկու անձն են հիմնականում շահագրգռված»,- ասաց Սաղաթելյանը։ 

Նրա խոսքով, նոր իշխանությունը պետք է գա, խոսի և Ադրբեջանի հետ, և Թուրքիայի հետ, բայց ոչ թե պետք է գնա և ասի՝ ձեզ ի՞նչ տամ, էլ ի՞նչ եք ուզում, այլ գնա և պաշտպանի իր երկիրը, իր ժողովրդի շահերը։

«Դա կարող ենք անել, դրա համար պետք է ուժեղ Հայաստան։

Ինչպե՞ս կարող ենք կերտել ուժեղ Հայաստան՝ արդյունավետ կառավարմամբ, նվիրյալներով, մարդկանցով, ովքեր պետք է տիրոջ զգացումով առաջնորդվեն, այլ ոչ թե ասեն՝ ով ինչ ուզում է, տանք, մենակ մեր իշխանությունը պահենք», - ասաց Իշխան Սաղաթելյանը։