Ձեր վստահելի աղբյուրը

«Ինքը մի կետով չի դատվելու։ Պետք է ճանաչվի միջազգային մարդասպան, պետական դավաճան, հայրենադավ, թուրքերի հետ համագործակցող»,- այսօր գլխավոր դատախազության շենքի դիմաց լրագրողների հետ զրույցում ասաց Արցախի հերոս, 44-օրյա պատերազմում զոհված Դավիթ Առուշանյանի մայրը՝ Լիդա Առուշանյանը։

Զոհվածի մայրը հայտարարեց՝ իր խոսքերի տերն է, փաստեր ունի, զոհված զինծառայողների ծնողներն էլ կօգնեն իրեն փաստահավաք գործում։

«Պետք է աշխարհի տարբեր երկրներից մենք լրագրողներ, մասնագետներ հրավիրենք, որպեսզի ցույց տանք, որ նա միջազգային հանցագործ է։ Ամեն ինչ արել է կանխամտածված։ Ես կորցնելու բան չունեմ, հանցագործներին պետք է դատել, ինչպես ասված է ռուսական հայտնի ֆիլմում «вор должен сидеть в тюрьме»: Ես իմ որդու, Արցախի իրավապաշտպանն եմ»,-ասաց Արցախի հերոսի մայրը։

Տիկին Լիդան Նիկոլ Փաշինյանի հետագա քայլերի վերաբերյալ իր վարկածն ունի։

«Զգուշացնում եմ՝ ինքը կարող է փախչել Բաքու, Ստամբուլ։ Կարող է կանչի իր եղբայրներին՝ Էրդողանին, Ալիևին, ասի, եղբայրներ, մեռնում եմ, եկեք օգնության։ Երրորդը՝ կարող է զորքը հանի, կամ էլ քաղաքացիական պատերազմ հրահրի էն զոմբիների ու մեր միջև։ Զգուշացեք ծնողներ, զգուշավեք,  քաղաքացիներ։ Հանցագործն ամեն ինչ ընդունակ է։ Տառապանքս փորձ ունի, գիտեմ»,-ասաց նա։

Հիշեցնենք, որ զոհված զինծառայողների հարազատները գլխավոր դատախազությունից, հակակոռուպցիոն կոմիտեից պահանջում են քրեական գործ հարուցել Նիկոլ Փաշինյանի դեմ։