Ձեր վստահելի աղբյուրը

«30 և ավելի տարիների ընթացքում մենք գրեթե բան չենք արել՝ հաշվի առնելով այն ռեսուրսը, որը կա սփյուռքում, որն շատ ավելի լուրջ և խորքային է»,-«Լույս` թունելի վերջում» պանելային քննարկման ժամանակ հայտնեց «Ջենեզիս արմենիա» ուղեղային կենտրոնի ղեկավար Աբրահամ Գասպարյանը

Նրա խոսքով սփյուռքը բազմաշերտ է և նրան ճանաչելը տարբեր փուլերի վերհանում է պահանջում:

Անդրադառնալով գործող իշխանությունների կողմից սփյուռքի  ուղղությամբ տարվող քաղաքականությանը՝ Գասպարյանն ասաց. «Անպես չէ, որ դու կարող ես սփյուռքի նախարարություն ստեղծես, 10 տարի աշխատես, պետական ռեսուրսներ և ֆինանսական միջոցներ ծախսես, փորձես հասնել ինչ-որ մի տեղ և հետո մի գիշերվա մեջ որոշես, որ այն պետք է լինի հանձնակատարի գրասենյակ և նշաձողը իջեցնես»:

Նրա խոսքով՝ 2018 թվականից հետո իշխանություններն անընդհատ նշաձողեր են իջեցնում, լուրջ հայեցակարգային հնդիներ առաջադրելու փոխարեն:

Ըստ Աբրահամ Գասպարյանի՝ իշխանության եկած խունտան սփյուռքի ուղղությամբ քայլ չարեց, քանի որ պետական քաղաքականության մեջ այն թեզերը, որոնցով պետք է առաջնորդվեին ինստիտուտները, փոխվեցին:

«Պետությունը սփյուռքի հետ կապված գաղափարախոսություն ունեցե՞լ է, թե ոչ: Որպես ի՞նչ է դիտարկել նրան՝ ընդամենը «Հայաստան» համահայկական հիմնադրամի շրջանակներում միջինացված 10 մլն դոլարի եզրերում տեղավորվող միավո՞ր, որ հետո ասեն՝ դե եկեք Հայաստան փող ծախսեք»,-ասաց բանախոսը և հայտարարեց, որ սփյուռքին լուրջ չեն վերաբերվել:

Ներկայացնելով սփյուռքի ներուժը՝ բանախոսը տեղեկացրեց, որ այսօր ամբողջ եվրասիական տարածաշրջանի ՄԱԿ-ի կրթական բոլոր ծրագրերի պատասխանատուն և գումար հատկացնողը արցախցի մի կին է, Հոլանդիայի կիբերանվտանգության պատասխանատուն կապանցի աղջիկ է:
Գասպարյանի խոսքով՝ իշխանությունը տարբեր գենդերային ծրագրերով զարգացումների ընթացքը փոխեց և տասնամյակներով սփյուռքում վաստակ ունեցողները մղվում էին հետին պլան և նշաձող իջեցնում էին:

«Փորձիր Անկախ Հայաստանում կամ Արցախում մեծացած հային ասա, որ Արցախը պետք է լինի Ադրբեջանի կազմում, այն չի ընկալվի, քանի որ դու գենետիկ կոդին հակառակ բան ես ասում»,-ասաց Աբրահամ Գասպարյանը:

«Ջենեզիզ արմենիա» ուղեղային կենտրոնի ղեկավարը հայտարարեց, որ արժեզրկելով սփյուռքի համար առաջնային արժեքներ համարվող դրոշը, Արցախի ինքնորոշման իրավունքը և վստահությունը՝ իշխանությունները լուրջ պառակտում են ստեղծել սփյուռքում և լրջորեն խաթարել նրանց վստահությունը դեպի մայր հայրենիք: