Ձեր վստահելի աղբյուրը

Դժվար է ասել, թե այսօր հանրապետության տարբեր վայրերում տեղի ունեցող ներքաղաքական բողոքի ակցիաները կհանգեցնեն իշխանափոխության,թե՝ ոչ։ Panorama.am-ի հետ զրույցում ԵՊՀ Քաղաքագիտության ամբիոնի պրոֆեսոր Գարիկ Քեռյանը կարծիք հայտնեց, որ իշխանափոխության համար առկա  ցնցումները դեռևս չեն հասել իրենց բարձրակետին։

«Երբ Փաշինյանը զգա, որ չի կարողանում տիրապետել իրավիճակին, հանդես կգա որոշակի հայտարարությամբ՝ լինի հրաժարականի, թե  արտահերթ ընտրությունների մասին։ Առայժմ հրաժարականի մտայնություն չի նկատվում։ Թեև մեկ-երկու օրվա տպավորությունս է։ Ամեն ինչ կախված է այն բանից, թե արդյոք բողոքի ակցիաներում ներգրավված մարդկանց քանակը կհասնի կուլմինացիոն կետի»,- նշեց քաղաքագետը։

Քեռյանի խոսքով՝  կուլմիանացիոն կետից հետո պետական կառավարման մարմինները կպարալիզացվեն և չեն կարողանա կատարել իրենց գործառույթները։

«Այս դեպքում իշխանությունները կամ հրաժարական կտան կամ կգնան արտահերթ խորհրդարանական ընտրությունների։ Իհարկե, հիմա իշխանությունների վրա ճնշումն օրեցօր մեծանում է։ Մարդկանց քանակն ավելանում է, բայց դեռ չեմ նկատում Փաշինյանի մոտ հրաժարական տալու մտայնություն»,- նշեց քաղաքագետը։

Քեռյանի խոսքով՝ շատ բան կախված է նաև մայիսի մեկին սպասվող հանրահավաքից։

«Հիմա բողոքական, ընդդիմադիր շարժումը նոր է վերելք ապրում։ Մայիսի մեկին հռչակված հանրահավաքից հետո հնարավոր է ուժերի հարաբերակցությունը փոխվի» ,- նշեց պրոֆեսորը՝ չբացառելով նաև կոմպրոմիսային իրավիճակների առաջացումը։

«Կարող է ստացվել այնպիսի իրավիճակ, երբ ընդդիմությունն ունենա այնքան ուժ, որ կարողանա տապալել իշխանությանը և ոչ էլ իշխանությունն այնքան ամուր լինի, որ կարողանա իրականացնել պետական կառավարման իր գործառույթները։ Այս  պարագայում կարող են գնալ փոխզիջումային համաձայնության։ Ըստ այդմ՝ կարող են փոխվել իշխանության հանգուցային ղեկավարներից ոմանք,ինչպես նաև հնարավոր է նոր հայտարարություն՝ Արցախի հարցի վերաբերյալ»։

Անդրադառնալով Փաշինյանի Արցախի հարցի վերաբերյալ արված ՝ նշաձողն իջեցնելու հայտարարությանը, Քեռյանը նախ նշեց, որ բողոքական շարժումը հիմնաված է Փաշինյանի՝ Արցախի հարցում պահանջատիրության շուրջ մեր նշաձողն իջեցնելու մասին հայտարարության վրա։

Բացի այդ, Արցախի հարցի առումով պետք է հետևենլ Մինսկի խմբի համանախագահողների հայտարարություններին, մասնավորապես, պետք է իջեցնել այդ նշաձողը, թե կշարունակեն պահպանել լռություն։

Ամեն դեպքում ներքաղաքական գործընթացներն , ըստ քաղաքագետի, շատ աննշան ազդեցություն կարող են ունենալ Արցախի հարցի կարագվորման վրա։

«Մի բան պարզ է ՝ ՀՀ-ն այլևս Արցախի անվտանգության երաշխավորը չէ։ Պատերազմում պարտությունից հետո Հայաստանի կարծիքը շատ քիչ են հաշվի առնում ։ Այս հարցում առաջընթաց կարող է լինել այն ժամանակ, երբ Ռուսաստանն Ուկրաինայում ավարտի իր գործողություններն ու վերադառնա հարավային Կովկաս։ Քանի դեռ Ռուսաստանը չի վերադարձել, ներկա իրավիճակը պահպանվելու է»,- եզրափակեց մեր զրուցակիցը։